ডিজিটেল ডেস্কঃ অষ্ট্ৰেলিয়াৰ এগৰাকী ৬২ বছৰীয়া মহিলাই তেওঁৰ মৃত স্বামীৰ শুক্ৰাণুৰে সন্তান জন্ম দিব বিচাৰিছে। এই বিষয়ে তেওঁ অনুমতি বিচাৰি আদালতৰো কাষ চাপিছিল। অৱশেষত আদালতে মহিলা গৰাকীক তেওঁৰ মৃত স্বামীৰ শুক্ৰাণুৰে সন্তান জন্ম দিয়াৰ অনুমতি প্ৰদান কৰিছে।
প্ৰাপ্ত তথ্য অনুসৰি ২০১৯ চনত মহিলাগৰাকীৰ ৩১ বছৰীয়া পুত্ৰ মটৰ দুৰ্ঘটনাত নিহত হোৱাৰ পিছত দম্পতীহালে আন এটা সন্তান জন্ম দিয়াৰ বিষয়ে ভাবিবলৈ আৰম্ভ কৰিছিল।ছবছৰ পূৰ্বে তেওঁলোকৰ ২৯ বছৰীয়া কন্যাৰো এক দুৰ্ঘটনাত মৃত্যু ঘটিছিল।
এই বেদনাদায়ক ঘটনাবোৰে দম্পতীহালক ৬১ বছৰীয়া স্বামীৰ শুক্ৰাণুৰে এগৰাকী চাৰোগেট মাতৃৰ সহায়ত সন্তান জন্ম দিয়াৰ বিষয়ে ভাবিবলৈ বাধ্য কৰোৱাইছিল।
১৭ ডিচেম্বৰত মহিলাগৰাকীৰ স্বামীৰো নিজৰ ঘৰতে মৃত্যু হোৱাৰ পিছত তেওঁৰ পত্নীয়ে চিকিৎসালয়ৰ মৰ্গত তেওঁৰ শুক্ৰাণু সংগ্ৰহ আৰু সংৰক্ষণ কৰিবলৈ বিচাৰিছিল।
কিন্তু আইনী বাধাৰ বাবে চিকিৎসালয়খনে তেনে কৰিবলৈ অস্বীকাৰ কৰিছিল। ইয়াৰ পিছতে মহিলাগৰাকীয়ে পশ্চিম অষ্ট্ৰেলিয়াৰ উচ্চতম ন্যায়ালয়ত জৰুৰী আদেশ বিচাৰি আবেদন কৰিছিল।
বিজ্ঞানৰ মতে মৃত্যুৰ একৰ পৰা দুদিনৰ ভিতৰত শুক্ৰাণু সংগ্ৰহ কৰিব পাৰি। বিচাৰক ফিওনা চিৱাৰ্ডে শুক্ৰাণু সংগ্ৰহ আৰু সঞ্চয় কৰাৰ আদেশ প্ৰদান কৰে। আদালতে এই আদেশটো ২১ ডিচেম্বৰতে দিছিল যদিও আদেশটোৰ কথা এতিয়াহে ৰাজহুৱা কৰা হৈছে।
ইয়াৰ পূৰ্বেও ২০২৩ চনৰ জুন মাহত এগৰাকী অষ্ট্ৰেলিয়ান মহিলাক তেওঁৰ ২৯ বছৰীয়া মৃত স্বামীৰ পৰা শুক্ৰাণু সংগ্ৰহৰ অনুমতি দিয়া হৈছিল।
