অৰুণাচল প্ৰদেশ আৰু ছিকিমত ভোটগণনা অব্যাহত, অৰুণাচলত চৰকাৰ গঠনৰ দিশে বিজেপি, ছিকিমত এন ডি এৰ মিত্ৰ দল ছিকিম ক্ৰান্তিকাৰী মৰ্চাৰ চৰকাৰ

দেওবাৰে আৰম্ভ হয় ভোটগণনা। গণনা আৰম্ভ হোৱাৰ লগে লগে প্ৰাৰম্ভিক ধাৰাত দুয়োখন ৰাজ্যতে গেৰুৱা ধুমুহা পৰিলক্ষিত হয়। ইতিমধ্যে অৰুণাচলত ৪৩খন আসনত আগবাঢ়ি আছে বিজেপি।  ১৯ এপ্ৰিলত প্ৰথম পৰ্যায়ৰ লোকসভা নিৰ্বাচন অনুষ্ঠিত হৈছিল। সেইদিনা উত্তৰ-পূব ভাৰতৰ দুখন ৰাজ্য অৰুণাচল আৰু ছিকিমতো বিধানসভা নিৰ্বাচন অনুষ্ঠিত হয়। অৰুণাচল বিধানসভাত মুঠ ৬০ খন আসন আছে। চৰকাৰ গঠন কৰিবলৈ প্ৰয়োজন হোৱা আসনৰ সংখ্যা ৩১। অৰুণাচলত বিজেপিয়ে ইতিমধ্যে  ১০খন আসনত বিনা প্ৰতিদ্বন্দ্বিতাৰে জয়লাভ কৰিছে। বাকী ৫০খন আসনত ভোটগ্ৰহণ কৰা  হৈছিল। 

পুৱা ৬ বজাৰ পৰা আৰম্ভ হোৱা ভোটগণনাত  বিজেপিয়ে প্ৰায়সংখ্যক আসনতে বিজয় সাৱ্যস্ত কৰিবলৈ সক্ষম হয়। অৰুণাচলৰ  চাংলাং উত্তৰ ৫৩ নং বিধানসভা সমষ্টিত বিজেপি প্ৰাৰ্থী, পংটে বিধানসভা সমষ্টিত বিজেপি প্ৰাৰ্থী,পাংগিং ৩৫ নং বিধানসভা সমষ্টিত বিজেপি প্ৰাৰ্থী,নামছাং ৫৪ নং বিধানসভা সমষ্টিত বিজেপি প্ৰাৰ্থী,পালিন ১৮ নং বিধানসভা সমষ্টিত বিজেপি প্ৰাৰ্থী,চ্যাংটাজো ৯ নং বিধানসভা সমষ্টিত বিজেপি প্ৰাৰ্থীৰ,খনছা পশ্চিম ৫৬ নং বিধানসভা সমষ্টিতো বিজেপি প্ৰাৰ্থী জয়ী হৈছে।  বিদায়ী মুখ্যমন্ত্ৰী পেমা খাণ্ডুৰ দলে মুঠ আসনৰ ভিতৰত ৪৩খন আসনত আগবাঢ়ি আছে।এইবেলি  অৰুণাচলৰ মুখ্যমন্ত্ৰী আছিল পেমা খাণ্ডুই বিনা প্ৰতিদ্বন্দ্বিতাৰে জয়ী হৈছিল। এইবাৰো তেওঁ যে মুখ্যমন্ত্ৰী হোৱাটো নিশ্চিত হৈ পৰিছে। 

কেৱল অৰুণাচলতে নহয়, চুবুৰীয়া ৰাজ্য ছিকিমতো এন ডি এৰ মিত্ৰ দল ছিকিম ক্ৰান্তিকাৰী মৰ্চা পুনৰ ক্ষমতালৈ অহাটো নিশ্চিত হৈছে।  বিগত বিধানসভা নিৰ্বাচনত এন ডি এ মিত্ৰজোঁটে ছিকিমৰ ৩২খন আসনৰ ভিতৰত ৩০খন আসন লাভ কৰিছিল। এইবাৰ ৩১খন আসনত আগবাঢ়ি আছে।  এছ ডি এফৰ প্ৰাৰ্থী তথা প্ৰাক্তন ভাৰতীয় ফুটবলাৰ বাইচুং ভুটিয়া পিছ পৰি আছে।