ডিজিটেল ডেস্কঃ চৰকাৰী চিকিৎসালয়ত পুনৰ ঔষধৰ অভাৱত কেইবাজনো ৰোগীৰ মৃত্যু ঘটাৰ খবৰ আহিছে। ঔষধৰ যোগান নথকাৰ বাবেই মহাৰাষ্ট্ৰৰ চৰকাৰী চিকিৎসালয়ত ২৪ জন লোকৰ মৃত্যু ঘটিছে। মৃত্যু ঘটা সকলৰ ভিতৰত ১২ টি নৱজাতকো আছে। । এই ঘটনাই বিজেপি শাসিত ৰাজ্যখনত হুলস্থূলৰ সৃষ্টি কৰিছে। বিৰোধী দলবোৰে চৰকাৰৰ বিৰুদ্ধে প্ৰতিবাদ সাৱস্ত্য কৰিছে।
যোৱা ২৪ ঘণ্টাত মহাৰাষ্ট্ৰৰ নান্দেৰ জিলাৰ শংকৰাৰাও চৱন চৰকাৰী চিকিৎসালয়ত ২৪ জন লোকৰ মৃত্যু ঘটে। চিকিৎসালয় কৰ্তৃপক্ষই প্ৰকাশ কৰা মতে ঔষধৰ পৰ্যাপ্ত যোগানৰ অভাৱৰ বাবেই এনে ঘটনা ঘটিছে। চিকিৎসালয়ৰ ডিনৰ মতে চিকিৎসালয় খনত পৰ্যাপ্ত আন্তঃগাঁথনি নাই।
ঔষধৰো কোনো নিয়মীয়া যোগান নাই। তথাপি হাজাৰ হাজাৰ লোকৰ আশা সেই চিকিৎসালয় খনেই ।এনচিপিয়ে বিষয়টোক লৈ মুখ্যমন্ত্ৰী একনাথ চিন্দেৰ চৰকাৰক সমালোচনা কৰিছে। দলৰ মুখপাত্ৰ বিকাশ লৱাণ্ডে কয়, "চৰকাৰ লজ্জিত হোৱা উচিত। উৎসৱটোৰ আড়ম্বৰপূৰ্ণ বিজ্ঞাপন দিয়া হৈছে। কিন্তু চিকিৎসালয়ত কোনো ঔষধ নাই। ৰোগীসকলে এনেদৰে প্ৰাণ হেৰুৱাইছে। "
উল্লেখ্য মহাৰাষ্ট্ৰই যোৱা বছৰ আগষ্টত একে ধৰণৰ ঘটনাৰ সাক্ষী হৈছিল।সেই সময়তো ২৪ ঘণ্টাত থানে জিলাৰ কালৱা অঞ্চলৰ ছত্ৰপতি শিৱাজী মহাৰাজ চিকিৎসালয়ত ১৭ জন ৰোগীৰ মৃত্যু হৈছিল।
Continue Reading
