ডিজিটেল ডেস্কঃ বৰ্তমান সময়ত পাকিস্তানী মহিলা সীমা হাইদৰ আৰু শচীনৰ প্ৰেম কাহিনীয়ে দেশত চৰ্চাৰ বিষয় হৈ পৰিছে। ইফালে সীমা হাইদৰৰ বিৰুদ্ধেও পাকিস্তানী চোৰাংচোৱা বুলি অভিযোগ উত্থাপন হৈছে। একে সময়তে ইউ পি এ টি এছৰ দলে পাকিস্তানী বাসিন্দা সীমা হাইদাৰক জিম্মাত লৈছে আৰু এ টি এছে সীমা হাইদৰক গোপন স্থানত জেৰা আৰম্ভ কৰিছে। সীমা হাইদৰ আৰম্ভণিৰে পৰাই এ টি এছৰ ৰাডাৰত আছিল, তেওঁ নেপাল হৈ ভাৰতলৈ আহিছিল প্ৰেমিক শচীনক লগ কৰিবলৈ।এতিয়া এ টি এছৰ দলটোৱে হোৱাটছএপ কথোপকথন আৰু সকলো প্ৰমাণৰ ভিত্তিত অধিক অনুসন্ধান কৰিব।
ইয়াৰ সমান্তৰালকৈ সীমাৰ আইডি কাৰ্ড উচ্চায়ুক্তলৈ প্ৰেৰণ কৰা হৈছে আৰু সীমাৰ ককাক পাকিস্তান সেনাবাহিনীৰ চুবেদাৰ আৰু সীমাৰ ভাতৃ পাকিস্তানী জোৱান বুলি জানিব পৰা গৈছে। ভাৰতৰ নিৰাপত্তা সংস্থাই এতিয়া সীমাক জেৰা কৰিব। প্ৰেম কাহিনীৰ পৰা আৰম্ভ কৰি ভাৰতলৈ অহালৈকে সকলো দিশতে সোধা-পোছা কৰা হৈছে। ইউ পিৰ এগৰাকী জ্যেষ্ঠ আৰক্ষী বিষয়াই কয় যে সীমা এগৰাকী পাকিস্তানী নাগৰিক আৰু তেওঁৰ ভাৰত আগমনত বহু সমস্যা আছে। এনে পৰিস্থিতিত তেওঁক জেৰা কৰাটো প্ৰয়োজনীয়, গতিকে দেশৰ নিৰাপত্তাৰ লগত জড়িত এনে সকলো সংস্থাই তেওঁক জেৰা কৰিব।
উল্লেখযোগ্য যে, সীমা আৰু শচীন মীনা ২০১৯ চনত PUBG খেলি থাকোঁতে ইজনে সিজনৰ সংস্পৰ্শলৈ আহিছিল আৰু তাৰ পাছত তেওঁলোকৰ প্ৰেম কাহিনী আৰম্ভ হৈছিল। ইয়াৰ পাছত ২০২৩ চনৰ ১৩ মে’ত সীমা হাইদৰে নেপাল হৈ বাছত উঠি ভাৰতলৈ আহিছিল। উত্তৰ প্ৰদেশ আৰক্ষীৰ মতে, সীমা আৰু শচীন গ্ৰেটাৰ নয়ডাৰ ৰাবুপুৰা অঞ্চলত বাস কৰে, য’ত শচীনে গেলামালৰ দোকান চলায়। একে সময়তে ভিছা অবিহনে নেপালৰ মাজেৰে চাৰিটা সন্তানৰ সৈতে অবৈধভাৱে ভাৰতত প্ৰৱেশ কৰাৰ অভিযোগত যোৱা ৪ জুলাইত আৰক্ষীয়ে সীমাক গ্ৰেপ্তাৰ কৰে। ইয়াৰ লগতে শচীনক অবৈধ শৰণাৰ্থীক আশ্ৰয় দিয়াৰ অভিযোগত জেললৈ প্ৰেৰণ কৰা হয়। যদিও দুয়োকে পিছত মুকলি কৰি দিয়া হৈছিল আৰু এতিয়া পুনৰ ইউ পি এ টি এছে সীমাক সোধা-পোছাৰ বাবে আটক কৰিছে।
Continue Reading
