ডিজিটেল ডেস্ক: অৰ্ধশতিকাৰ পাছত চৰ্চালৈ আহিছে লেটিন আমেৰিকান কবি পাবলো নেৰুডাৰ মৃত্যুৰ ঘটনা৷ ১৯৭৩ৰ ২৩ ছেপ্টেম্বৰত আকস্মিকভাৱে মৃত্যুক সাবটি লৈছিল বিশ্বখ্যাত কবিগৰাকীয়ে৷ নিজৰ দেশক প্ৰতিনিধিত্ব কৰি বিশ্বৰ কেইবাখনো দেশলৈ ৰাষ্ট্ৰদূত হিচাপে গৈছিল নেৰুডা৷
সেই সময়ত প্ৰষ্টেট কেন্সাৰত ভুগি থকা নেৰুডাৰ হৃদযন্ত্ৰৰ ক্ৰিয়া বন্ধ হৈ মৃত্যু হোৱা চিলিৰ চৰকাৰে সদৰী কৰিছিল যদিও তেওঁৰ মৃত্যুক লৈ সৃষ্টি হৈছিল ৰহস্যৰ৷ তেওঁৰ একাংশ অনুৰাগৰী মতে সেয়া স্বাভাৱিক মৃত্যু নাছিল৷ নেৰুডাক হত্যা কৰা বুলি অভিযোগ কৰিছিল একাংশই৷ মাৰ্ক্সীয় দৰ্শনত বিশ্বাসী নেৰুডাক হত্যাৰ অভিযোগ উঠিছিল এটা সামৰিক অভ্যত্থানেৰে চালভাদৰ এলেন্দিৰ চৰকাৰৰ পতন ঘটোৱা আগষ্টা পিনোচেটৰ বিৰুদ্ধে৷
কবিগৰাকীৰ মৃত্যুৰ পঞ্চাশ বছৰৰ পাছত তেওঁৰ ভতিজাকে সদৰী কৰিছে যে বিহ প্ৰয়োগেৰে পিনোচেটৰ উদ্যোগতেই হত্যা কৰা হৈছিল নেৰুডাক৷ ভতিজাকৰ এই চাঞ্চল্যকৰ দাবীৰ পাছত এতিয়া পুনৰ সৃষ্টি হৈছে ৰহস্যৰ৷ পুনৰ খোল খাইছে নেৰুডাৰ মৃত্যু কাহিনীৰ নোখোলা পৃষ্ঠা৷
আনহাতে, আন্তৰ্জাতিক ফৰেনছিক বিশেষজ্ঞই দাখিল কৰা প্ৰতিবেদনত দাবী কৰা হৈছে যে ১৯৭৩চনত পাবলো নেৰুডাৰ কৰ্কট ৰোগত আক্ৰান্ত হৈ মৃত্যুমুখত পৰা নাছিল৷ বৰঞ্চ বিহ খুৱাইহে হত্যা কৰা হৈছিল তেওঁক৷ কানাডা, ডেনমাৰ্ক আৰু চিলিৰ ফৰেনছিক বিশেষজ্ঞৰ এটা দলে দহবছৰীয়া অনুসন্ধানৰ অন্তত এই সিদ্ধান্তত উপনীত হৈছে৷
বুধবাৰে প্ৰকাশ পোৱা প্ৰতিবেদন অনুসৰি নেৰুডাৰ শৰীৰত বিষাক্ত বেক্টেৰিয়াৰ অৱস্থিতি পোৱা গৈছিল৷ মৃত্যুৰ পূৰ্বে নেৰুডাৰ শৰীৰত এনে প্ৰাণঘাতী বেক্টেৰিয়া আছিল বুলিও দাবী কৰিছে ফৰেনছিক বিশেষজ্ঞৰ দলটোৱে৷ ১৯৭১ৰ সাহিত্যৰ নোবেল বঁটা লাভ কৰিছিল নেৰুডাই৷ ১৯৭৩ত চিলিত সামৰিক অভ্যুত্থানৰ সময়ত নেৰুডা হাস্পতালত আছিল৷ তাৎপৰ্যপূৰ্ণভাৱে দেশত্যাগ কৰাৰ ৫ ঘণ্টা পূৰ্বে মৃত্যু হৈছিল নেৰুডাৰ৷
Continue Reading
