ডিজিটেল ডেস্কঃ পাকিস্তানক বিশ্বৰ অন্যতম বিপদজনক দেশ হিচাপে অভিহিত কৰিলে জ’ বিডেনে। আমেৰিকা যুক্তৰাষ্ট্ৰৰ ৰাষ্ট্ৰপতিজনে কৈছে যে পাকিস্তানে কোনো কাৰণ নোহোৱাকৈ আণৱিক অস্ত্ৰ নিজৰ হাতত ৰাখিছে।
লছ এঞ্জেলছত অনুষ্ঠিত হোৱা ডেম’ক্ৰেটিক পাৰ্টিৰ অনুষ্ঠানত ৰাষ্ট্ৰপতিজনে এই মন্তব্য কৰিছে। পাকিস্তানৰ লগতে তেওঁ চীনৰ প্ৰতিও ক্ষুৰধাৰ সমালোচনাত মুখৰ হৈ পৰে।
লগতে আমেৰিকা যুক্তৰাষ্ট্ৰৰ বৈদেশিক নীতিৰ সম্পৰ্কেও বিডেনে বহুকেইটা ভাষ্য আগবঢ়ায়। পাকিস্তানৰ চেহবাজ শ্ব’ৰিফ চৰকাৰে আমেৰিকা যুক্তৰাষ্ট্ৰৰ স’তে সম্পৰ্ক উন্নত কৰিবলৈ চেষ্টা কৰি থকাৰ অৱস্থাতে বিডেনৰ মন্তব্যটোৱে ব্যাপক তাৎপৰ্য বহন কৰিছে।
উল্লেখযোগ্য যে বুধবাৰে আমেৰিকা যুক্তৰাষ্ট্ৰৰ নেচনেল চিকিউৰিটী ষ্ট্ৰেটেজীয়ে এখন ৪৮ পৃষ্ঠাৰ এখিন তথ্যপুস্তিকা প্ৰকাশ কৰিছিল। তাত চীন আৰু ৰাছিয়াক আমেৰিকা যুক্তৰাষ্ট্ৰৰ প্ৰতি ভাবুকি বুলি উল্লেখ কৰা হৈছিল। কিন্তু পাকিস্তানৰ নাম উল্লেখ কৰা হোৱা নাছিল।
ইউক্ৰেইনত ৰাছিয়াই চলোৱা যুদ্ধই ভাবুকি কঢ়িয়াই অনা বুলি আমেৰিকা যুক্তৰাষ্ট্ৰই মন্তব্য প্ৰকাশ কৰি আহিছে। তদুপৰি এছিয়া মহাদেশৰ দেশৰ ভিতৰত আটাইতকৈ বিপদজনক দেশ হিচাপে চীনৰ নাম নেচনেল চিকিউৰিটী কাউন্সিলে লৈ আহিছে। তেনে অৱস্থাত পাকিস্তানৰ বিষয়ে জ’ বিডেনে কৰা মন্তব্যই অত্যন্ত চৰ্চা লাভ কৰিছে।
Continue Reading
