পাকিস্তানক সৰিয়হ ফুল দেখুওৱা কোহলীক অৱসৰ লোৱাটো বিচাৰে ছোৱেইব আখটাৰে, কিন্তু কিয়?

ডিজিটেল ডেস্কঃ নিজৰ দূৰ্দান্ত ফৰ্ম ঘূৰাই পোৱা বিৰাট কোহলীয়ে অৱসৰ লোৱাটো বিচাৰে ছোৱেইব আখটাৰে। এসময়ত বাঘা  বাঘা বেটছমেনৰ বাবে ত্ৰাসৰ কাৰণ হৈ পৰা পাকিস্তানৰ ফাষ্ট বলাৰগৰাকীয়ে কোহলীক এক বিশেষ উপদেশ দিছে।

“মই তেওঁক টি২০ ক্ৰিকেটৰ পৰা অৱসৰ লোৱাটো বিচাৰো। ইয়াৰ কাৰণ হৈছে তেওঁৰ সমস্ত শক্তি টি২০ ক্ৰিকেটত প্ৰয়োগ কৰাটো মই নিবিচাৰো।”- নিজৰ ইউটিউব চেনেলৰ যোগেৰে আখটাৰে কয়।

আখটাৰে কয় যে শেহতীয়া পাকিস্তানৰ বিৰুদ্ধে কোহলীয়ে যি প্ৰদৰ্শন আগবঢ়ালে, এনে প্ৰদৰ্শন কৰিলে এদিনীয়া ক্ৰিকেটত তিনিটাকৈ শতক অৰ্জন কৰিব পাৰিব।

“মোৰ মতে, পাকিস্তানৰ বিৰুদ্ধে তেওঁ জীৱনৰ আটাইতকৈ শ্ৰেষ্ঠ ইনিংছটো খেলিলে।”- আখটাৰে কয়- “তেওঁ এইদৰে খেলাৰ মূল কাৰণ হৈছে তেওঁৰ আত্মবিশ্বাস”।

লগতে ফৰ্মহীন অৱস্থাত কোহলীক বিভিন্নজনে কৰা সমালোচনাসমূহৰ বিষয়েও আখটাৰে সোঁৱৰে। আখটাৰে কয় যে কোহলীৰ উপৰিও তেওঁৰ পৰিয়ালৰ ওপৰতো বিভিন্নজনে কটু মন্তব্য কৰি আহিছি।

 “কিন্তু কিং কোহলী পুনৰ ঘূৰি আহিছে আৰু মই তেওঁৰ বাবে বহুত সুখী। তেওঁ এজন শ্ৰেষ্ঠ ক্ৰিকেটাৰ।”- আখটাৰে কয়।