পাকিস্তানত ভয়ংকৰ বিস্ফোৰণ, নিহত কমেও ১০

ডিজিটেল ডেস্ক: পাকিস্তানৰ কৰাচীত এক ভয়ংকৰ বিস্ফোৰণ সংঘটিত হৈছে আৰু বিস্ফোৰণত অতি কমেও ১০জন লোক নিহত হোৱাৰ খবৰ আহিছে। শনিবাৰে দিনত সংঘটিত হোৱা বিস্ফোৰণটোত আন কেইবাগৰাকী লোক আহত হয়।

কৰাচীৰ শ্বেৰশ্বাহৰ পৰাচা চ’ক অঞ্চলৰ এটা ব্যক্তিগত খণ্ডৰ বেংকৰ তলত থকা নৰ্দমাত বিস্ফোৰণটো সংঘটিত হোৱা বুলি স্থানীয় সংবাদ মাধ্যমত প্ৰকাশ কৰিছে। নলাটোৰে পৰিবাহী গেছ বিস্ফোৰণৰ কাৰক বুলি ধাৰণা কৰা হৈছে। ইতিমধ্যে নলাটো পৰিষ্কাৰ কৰিবলৈ বিল্ডিংটো খালী কৰিবলৈ বেংক কৰ্তৃপক্ষক জাননী জাৰি কৰা হৈছিল বুলি জানিব পৰা গৈছে। আৰক্ষীয়ে সংবাদ মাধ্যমক জনোৱা অনুসৰি নলাটোৰ মাজেৰে যোৱা গেছ পাইপলাইনত বিস্ফোৰণটো সংঘটিত হৈছে। বিস্ফোৰণটো ইমানেই শক্তিশালী আছিল যে, দাঁতিকাষৰীয়া অন্য বিল্ডিঙৰো ক্ষতিসাধন হয়। গেছ পাইপলাইনত কিহৰ স্ফুলিংগই বিস্ফোৰণ সংঘটিত কৰিলে সেয়া তাৎক্ষণিকভাৱে জানিব পৰা হোৱা নাই আৰু বিস্ফোৰণ বিশেষজ্ঞৰ এটা দল ঘটনাস্থলীলৈ মাতি পঠিওৱা বুলি আৰক্ষীৰ এগৰাকী মুখপাত্ৰই জনায়।