প্ৰাক্তন মাৰ্কিন ৰাষ্ট্ৰপতি ডোনাল্ড ট্ৰাম্পৰ ঘৰত এফবিআইৰ তালাচী, কিয় চলালে তালাচী?

বিশেষ সূত্ৰই প্ৰকাশ কৰা মতে ট্ৰাম্পে   ৰাষ্ট্ৰপতি হৈ থকাৰ সময়তে  কিছুমান গুৰুত্বপূৰ্ণ নথিপত্ৰ পাম বীচৰ এটা ৰিজৰ্টলৈ স্থানান্তৰ কৰিছিল।ব্যৱসায়ত কৰ ফাঁকি দিয়াৰ অভিযোগত ট্ৰাম্পৰ বিৰুদ্ধে  ইতিমধ্যে তদন্ত আৰম্ভ কৰা হৈছে। বিশ্বৰ বিভিন্ন দেশত ব্যৱসায়ৰ বিশাল সাম্ৰাজ্য থকা ট্ৰামে কৰ ফাঁকি দিয়াৰ অভিযোগ আজিৰ নহয়৷ তেওঁৰ বিৰুদ্ধে বহু দিনৰে পৰাই এই অভিযোগ উঠি আহিছে৷  বিবৃতিটোত  ট্ৰাম্পে কয়, "এফবিআই এজেণ্টৰ এটা দলে মোৰ ঘৰলৈ আহিছিল। এফবিআইৰ এজেণ্টসকলে ঘৰটোত তালাচী  চলোৱাৰ  পিছত ঘৰটো  জব্দ কৰিব বিচাৰিছিল"।  অৱশ্যে ট্ৰাম্পে তেওঁৰ ঘৰত তালাচীৰ  সঠিক কাৰণ সম্পৰ্কে কোনো মন্তব্য কৰা নাই।

ট্ৰাম্পে তালাচীৰ ঘটনাটোত ক্ষোভ প্ৰকাশ কৰি কয়   "মই ইমান দিন ধৰি চৰকাৰী কাৰ্যালয়ত কাম কৰিছো আৰু সকলোকে সহায় কৰিছো। তাৰ বিনিময়ত জাননী অবিহনে মোৰ ঘৰত অভিযান চলোৱাৰ  কোনো প্ৰয়োজন নাছিল। " ট্ৰাম্পে বিবৃতিত এইবুলিও কৈছে যে  তৃতীয় বিশ্বৰ দেশসমূহত  এনেদৰে আগতীয়াকৈ অৱগত নকৰাকৈ তালাচী চলাই থকা হৈছে । আমেৰিকা এতিয়া সেই স্তৰলৈ নামি গ’ল বুলি তেওঁ ক্ষোভ প্ৰকাশ কৰে৷ ট্ৰাম্পে দাবী কৰিছে যে তেওঁক দমন কৰাৰ সকলো প্ৰচেষ্টা বিফল হ'ব। তৃতীয় বিশ্বৰ দেশ বুলি কৈ ট্ৰাম্পে ভাৰত নে আন দেশক বুজাব বিচাৰিছে সেয়া স্পষ্ট হোৱা নাই৷ ট্ৰাম্পে লগতে এইবুলি অভিযোগ কৰিছে যে  তেওঁৰ বিৰোধী শক্তিয়ে তেওঁৰ বিৰুদ্ধে ষড়যন্ত্ৰ কৰি আছে, যাতে তেওঁ ২০২৪ চনৰ ৰাষ্ট্ৰপতি নিৰ্বাচনত অংশগ্ৰহণ কৰিব নোৱাৰে।

আমেৰিকা যুক্তৰাষ্ট্ৰৰ সংবাদ সংস্থা সমূহৰ মতে এফবিআইৰ অভিযানৰ সময়ত ট্ৰাম্প পাম বীচ ৰিজৰ্টত উপস্থিত নাছিল। এফবিআইয়ে ট্ৰাম্পৰ ৰিজৰ্টত যাৱতীয় অনুমতি হৈহে প্ৰৱেশ কৰা বুলি জানিব পৰা গৈছে৷