ডিজিটেল ডেস্কঃ পাপ্পাৰাজীৰ কবলত পৰি হতভম্ব হৈ পৰিল ব্ৰিটেইনৰ ৰাজকুমাৰ হেৰী আৰু তেওঁৰ পত্নী মেঘান মাৰ্কলে। মঙলবাৰে নিশা ৰাজকুমাৰ হেৰী আৰু মেঘানৰ টীমটোক পাপাৰাজ্জিয়ে এক বিপজ্জনকভাৱে অনুসৰণ কৰিছিল।
এই কাণ্ডই ১৯৯৭ চনত ৰাজকুমাৰ হেৰীৰ মাতৃ ৰাজকুমাৰী ডায়েনাৰ মৃত্যু ঘটা গাড়ী দুৰ্ঘটনাৰ স্মৃতিলৈ মনত পেলাই দিলে। পাপাৰাজ্জিয়ে খেদি ফুৰাৰ ফলতে ডায়েনাৰ মৃত্যু হৈছিল।
বুধবাৰে প্ৰকাশ পোৱা বাতৰি অনুসৰি, হেৰী আৰু মেঘানৰ কাৰ্যালয়ে নিউয়ৰ্ক চহৰত ৰাজকীয় দম্পতীহালে এটা চেৰিটি ইভেণ্ট এৰি যোৱাৰ পিছতে সংঘটিত হোৱা ‘প্ৰায় বিপজ্জনক’ (near catastrophic) অনুসৰণৰ বৰ্ণনা কৰিছে।
সংবাদ মাধ্যমৰ বাতৰিত তেওঁলোকৰ মুখপাত্ৰৰ উদ্ধৃতিৰে কোৱা হৈছে যে মঙলবাৰে নিউয়ৰ্কত অনুষ্ঠিত হোৱা এটা চেৰিটি অনুষ্ঠানৰ পৰা ওলাই অহাৰ পিছত এই যুটি আৰু মেঘানৰ মাতৃ ড’ৰিয়া ৰেগলেণ্ডক দুঘণ্টাৰো অধিক সময় আধা ডজন বাহনে অনুসৰণ কৰিছিল।
বুধবাৰে তেওঁলোকৰ দলটোৱে এক বিবৃতিত কয় যে দম্পতীহালৰ ফটো তুলিবলৈ ‘অতি আক্ৰমণাত্মক পাপাৰাজ্জিৰ হাতত’ অতিষ্ঠ হৈ পলোৱাৰ ফলত ‘ৰাস্তাত আন চালক, পথচাৰী আৰু দুজন এন ৱাই পি ডি বিষয়াৰ সৈতে একাধিক নিকট সংঘৰ্ষৰ উপক্ৰম হয়।
নিউয়ৰ্ক আৰক্ষী বিভাগে জনোৱা মতে, মঙলবাৰে নিশা বিষয়াসকলে ৰাজকীয় যুটিটোৰ নিৰাপত্তাৰ ক্ষেত্ৰত সহায় কৰিছিল যদিও তেওঁলোকে ইয়াক ‘কাৰ চেজ’ বুলি বৰ্ণনা কৰা নাই।
Continue Reading
