ডিজিটেল ডেস্কঃ চুবুৰীয়া দেশ চীনত প্ৰবল ভূমিকম্প। এই প্ৰবল ভূমিকম্পৰ পাছত কেইবাটাও মৃদ জোকাৰণিও অনুভূত হয়। উত্তৰ-পশ্চিম চীনৰ গাংছু প্ৰদেশত সোমবাৰে নিশা ১১:৫৯ অনুভূত হয় এই ভূমিকম্প। ভূমিকম্পৰ প্ৰাবল্য ইমানেই বেছি আছিল যে মৃত্যু হোৱা লোকৰ সংখ্যা ১১০ৰো অধিক হৈছে। কমেও ৪০০জন লোক গুৰুতৰভাৱে আহত হয়।
গাংছুৰ চুবুৰীয়া কিংহাই প্ৰদেশতো ভূমিকম্পৰ ফলত বহু ক্ষতিগ্ৰস্ত হয়। ইয়াত প্ৰায় ১০ জন লোকৰ মৃত্যু হোৱাৰ বিপৰীতে ১২৪ জন গুৰুতৰভাৱে আহত হয়। বহু ঘৰ ধ্বংসপ্ৰাপ্ত হৈছে। মঙলবাৰে পুৱাৰে পৰা উদ্ধাৰ কাম আৰম্ভ কৰা হয়।
স্থানীয় সংবাদ মাধ্যমৰ মতে, গাংছু প্ৰদেশৰ ৰাজধানী লানঝৌৰ পৰা প্ৰায় ১০০ কিলোমিটাৰ দক্ষিণ-পশ্চিমে থকা অঞ্চলত প্ৰবল কঁপনি অনুভূত হয়।
কিংহাই প্ৰদেশৰ হাইডং চহৰতে ১১ জন লোকৰ মৃত্যু হোৱাৰ লগতে শতাধিক লোক আহত হৈছে। বহু গাঁৱত বিদ্যুৎ আৰু পানী যোগান বন্ধ হৈ পৰিছে।
আমেৰিকাৰ ভূতাত্ত্বিক জৰীপৰ তথ্য অনুসৰি ৰিখটাৰ স্কেলত এই ভূমিকম্পৰ প্ৰাবল্য আছিল ৫.৯। আনহাতে স্থানীয় সংবাদ মাধ্যমৰ মতে ভূমিকম্পৰ প্ৰাবল্য আছিল ৬.২। মৃত্যু হোৱা লোকৰ সংখ্যা অধিক হোৱাৰ আশংকা কৰা হৈছে।
Continue Reading
