প্ৰচণ্ড শীতে প্ৰাণ ল’লে ২১ৰো অধিক লোকৰ

ডিজিটেল ডেস্কঃ শনিবাৰে পাকিস্তানৰ মুৰীত প্ৰচণ্ড তুষাৰপাতৰ বাবে মৃত্যু হৈছে কেইবাজনো লোকৰ৷ তুষাৰপাতৰ বাবে বাহনৰ ভিতৰত কেইবা ঘণ্টা ধৰি আৱদ্ধ হৈ আছিল বহু লোক৷ তাৰে ভিতৰত এতিয়ালৈকে কমেও ২১ জন মৃত ব্যক্তিক ঘটনাস্থলীৰ পৰা উদ্ধাৰ কৰা হৈছে৷ এই সকলৰ ভিতৰত অধিকাংশই হৈছে পৰ্যটক। ঘটনা সন্দৰ্ভত এটা ভিডিঅ’ বাৰ্তা যোগে পাকিস্তানৰ অভ্যন্তৰীণ মন্ত্ৰী শ্বেখ ৰছিদে এক বক্তব্য আগবঢ়াইছে৷ তেওঁ উল্লেখ কৰা মতে মৃতসকলৰ ভিতৰত কমেও ৯জন শিশু আছিল৷ মুৰীৰ এই শোকাৱহ ঘটনাৰ কেইঘণ্টামান পিছতেই অঞ্চলটোক দুৰ্যোগ পীড়িত অঞ্চল হিচাপে ঘোষণা কৰিছে পাঞ্জাব প্ৰদেশ চৰকাৰে।

ঘটনাস্থলীত এতিয়াও উদ্ধাৰ অভিযান অব্যাহত৷ পাকিস্তানৰ সেনাই স্থানীয় লোকসকলৰ সহযোগত উদ্ধাৰ অভিযান অব্যাহত ৰাখিছে৷ পাকিস্তান সেনাৰ লগতে ৰাৱালপিণ্ডি আৰু ইছলামাবাদৰ আৰক্ষী বিষয়াসকলৰ লগতে উদ্ধাৰকাৰী ১১২২ জন বিষয়া চহৰখনত উপস্থিত হৈ উদ্ধাৰ অভিযান চলাই আছে। ঘটনাস্থলীত স্থানীয় লোকসকল উপস্থিত হৈ আৱদ্ধ হৈ থকা লোকসকলক উদ্ধাৰৰ লগতে যাৱতীয় সা-সুবিধা প্ৰদানৰ চেষ্টা অব্যাহত ৰাখিছে৷ স্থানীয় লোকসকলে তুষাৰপাতত আৱদ্ধ পৰ্যটকসকলক কম্বল আৰু গৰম খাদ্য যোগান ধৰি সহায় আগবঢ়াইছে বুলি জানিব পৰা গৈছে।
ইতিমধ্যে পঞ্জাৱ প্ৰদেশ চৰকাৰে মানুহক তুষাৰপাতৰ বাবে আঁতৰি থাকিবলৈ আহ্বান জনাইছে। পঞ্জাৱ প্ৰদেশৰ মুখ্যমন্ত্ৰী উছমান বুজদাৰে কৈছিল যে আৱদ্ধ পৰ্যটকসকলক স্থানান্তৰ কৰাটো তেওঁৰ প্ৰথম অগ্ৰাধিকাৰ৷ পঞ্জাৱ প্ৰদেশ চৰকাৰে তুষাৰপাতত আৱদ্ধ পৰ্যটকসকলৰ বাবে বিশ্ৰাম গৃহ আৰু ৰাজ্যিক ভৱন মুকলি কৰি দিছে।