ডিজিটেল ডেস্কঃ সমগ্ৰ দেশত প্ৰচণ্ড শীত হৈছে। উত্তৰ প্ৰদেশৰ আমৰোহা জিলাৰ পৰা পোহৰলৈ আহিছে এক যন্ত্ৰণাদায়ক ঘটনা। ঘৰতে শুই থকা একেটা পৰিয়ালৰ পাঁচটা সন্তানৰ শ্বাসৰুদ্ধ হৈ মৃত্যু হয়। আন দুজনৰ অৱস্থা সংকটজনক হোৱাৰ বাবে তেওঁলোকক চিকিৎসালয়ত ভৰ্তি কৰোৱা হৈছে। জানিব পৰা মতে, ঠাণ্ডাৰ পৰা হাত সাৰিবলৈ পৰিয়ালটোৱে ৰাতি শোওতে কয়লা জ্বলাই শুইছিল।
আপোনালোকক জনাওঁ যে এই বেদনাদায়ক দুৰ্ঘটনা সংঘটিত হৈছে ছাইদ নাগলী থানা এলেকাৰ আল্লীপুৰ ভূদ গাঁৱত। ইয়াৰ বাসিন্দা ৰাইছুদ্দিনৰ ঘৰত সোমবাৰে নিশা প্ৰায় ৮ বজাত তেওঁৰ পত্নী, তিনিটা সন্তান আৰু আত্মীয়ৰ দুটা সন্তানে ৰাতিৰ আহাৰ গ্ৰহণ কৰি শুইছিল। শীতৰ পৰা পৰিত্ৰাণ পাবলৈ নিশা কয়লা জ্বলাই টোপনি গৈছিল পৰিয়ালটো। পাছদিনা তেওঁলোকৰ ঘৰৰ এজনকো বাহিৰত নেদেখি চুবুৰীয়াই ঘৰৰ দুৱাৰখন ভাঙি সোমাই যায়।
মানুহে ভিতৰলৈ সোমাই গ’লে দেখিলে যে পৰিয়ালটোৰ ৫ টি শিশুমৃত অৱস্থাত পৰি আছে, আনহাতে দুজন অচেতন অৱস্থাত আছে। ধোঁৱাই গোটেই ঘৰখন আৱৰি ধৰিছিল। লগে লগে মানুহে আৰক্ষীক খবৰ দিয়ে। এই তথ্য লাভ কৰাৰ লগে লগে আৰক্ষী উপস্থিত হৈ সকলোকে চিকিৎসালয়লৈ লৈ যায়, য’ত ৫টিকৈ শিশুক চিকিৎসকে মৃত বুলি ঘোষণা কৰাৰ বিপৰীতে দুজনক সংকটজনক অৱস্থাত চিকিৎসালয়ত ভৰ্তি কৰোৱা হৈছে।
আৰক্ষীয়ে কয়লাৰ প্ৰচণ্ড ধোঁৱাত অক্সিজেনৰ অভাৱ হৈ শ্বাসৰুদ্ধকৰ হোৱাৰ বাবেই এই ঘটনা সংঘটিত হোৱা বুলি কয়। বিষয়টোৰ তদন্ত কৰি আছে আৰক্ষীয়ে।
Continue Reading
