ডিজিটেল ডেস্ক: দেশবাসীক পৰিৱৰ্তন আৰু ভাল দিনৰ সপোন দেখুৱাই আঠ বছৰ পূৰ্বে ভাৰতৰ প্ৰধানমন্ত্ৰীৰ আসনত অধিষ্ঠিত হৈছিল নৰেন্দ্ৰ মোদী৷ নৰেন্দ্ৰ মোদীক কেন্দ্ৰ কৰি দেশৰ গৰিষ্ঠসংখ্য জনতাৰ আশা-আকাংক্ষাৰ শেষ নাছিল৷ যেন ৰূপান্তৰৰ যাদুদণ্ডৰে প্ৰধানমন্ত্ৰী মোদীয়ে মচি দিব অতকালৰ দুখ-বেদনা অথবা অপ্ৰাপ্তিৰ হুমুনিয়াহ৷ আৰু নতুন দিনৰ স্বপ্নৰে নিজকে নতুনকৈ সজাব মোদীৰ নেতৃত্বত৷ এয়াই আছিল গৰিষ্ঠসংখ্যকৰ চিন্তা আৰু আকাংক্ষাৰ উচ্চতাৰ স্তৰ৷

কাৰ্যকালৰ আঠ বছৰ গৰকা সেইগৰাকী প্ৰধানমন্ত্ৰী মোদীয়েই এদিন নিশা আঠ বজাত অকস্মাতে ঘোষণা কৰিছিল দেশত পাঁচশ আৰু এহেজাৰ টকীয়া নোটৰ প্ৰচলন বন্ধ হোৱাৰ কথা৷ তল-ওপৰ লাগিছিল দেশ৷ বিষয়টো তৰ্কিবই পৰা নাছিল মোদীৰ বিশ্বস্ত মহলেও৷ আৰু মোদীয়ে বিচৰা ধৰণেই নাইকিয়া হৈ পৰিছিল পাঁচশ-এহেজাৰ টকীয়া নোটবোৰ৷ দূৰদৰ্শনযোগে দিয়া ভাষণত প্ৰধানমন্ত্ৰী নৰেন্দ্ৰ মোদীয়ে পাকিস্তানৰ দ্বাৰা সন্ত্ৰাসবাদীৰ পুঁজি নিয়ন্ত্ৰণ, জাল মুদ্ৰা মুদ্ৰণ, ক'লা ধন আৰু দুৰ্নীতিৰ চাৰিটা উদ্দেশ্য পূৰণ কৰাৰ বাবে ২০১৬ চনৰ ৮ নৱেম্বৰ, নিশা ৮ বজাত বিমুদ্ৰাকৰণ ঘোষণা কৰিছিল৷ 

 

নিশাটোৰ ভিতৰতে দেশত ৫০০ আৰু ১,০০০ টকাৰ নোট বন্ধ ঘোষণা কৰাৰ সময়ত প্ৰধানমন্ত্ৰী মোদীয়ে দাবী কৰিছিল যে দেশত যাতে কোনো জাল নোট আৰু ক’লা ধন নাথাকে তাৰ বাবে এই পদক্ষেপ গ্ৰহণ কৰা হৈছে। কিন্তু সেই সিদ্ধান্তৰ পাঁচবছৰ উকলি গ’ল৷ নকল নোটৰ সংখ্যা প্ৰতি বছৰে বৃদ্ধি পোৱাৰ তথ্যহে এতিয়া স্পষ্ট হৈ পৰিছে। স্বয়ং ৰিজাৰ্ভ বেংকৰ পৰিসংখ্যাই প্ৰকাশ কৰিছে এই চাঞ্চল্যকৰ তথ্য৷

 

শেহতীয়াকৈ এই তথ্যৰ আঁত ধৰি তৃণমূল কংগ্ৰেছৰ সাংসদ ডেৰেক অ’ব্ৰায়েনে বিজেপি চৰকাৰ আৰু প্ৰধানমন্ত্ৰী নৰেন্দ্ৰ মোদীক সমালোচনাৰে থকা সৰকা কৰিছে৷ কালি এটা টুইটযোগে তেওঁ কয়, প্ৰধানমন্ত্ৰী নৰেন্দ্ৰ মোদী ডাঙৰীয়া নমস্কাৰ। আপোনাৰ বিমুদ্ৰাকৰণৰ কথা মনত আছেনে? সেই সময়ত মমতা বেনাৰ্জীয়ে আপোনাৰ বিৰোধিতা কেনেকৈ কৰিছিল? আপুনি কিদৰে কৈছিল যে বিমুদ্ৰাকৰণৰ ফলত সকলো ভুৱা নোট বন্ধ হ'ব? এতিয়া ৰিজাৰ্ভ বেংকৰ প্ৰতিবেদনত কি কোৱা হৈছে চাওঁ আহক। এই তথ্য অনুসৰি, নকল নোটৰ পৰিমাণ বৃদ্ধি পাইছে।

 

ডেৰেক অ’ব্ৰায়েনেও টুইটটোৰ সৈতে এটা গ্ৰাফিক্সো সংযোগ কৰি দিয়া পৰিলক্ষিত হয়। তেওঁ দেখুৱাইছিল যে ২০২০-২১ বৰ্ষৰ পৰা ২০২১-২২ বৰ্ষলৈ ৫০০ টকাৰ নোট ১০১.৯ শতাংশ বৃদ্ধি পাইছে আৰু ২০০০ টকাৰ নকল নোট ৫৪.৬ শতাংশ বৃদ্ধি পাইছে৷

 

মন কৰিলগীয়া যে নৰেন্দ্ৰ মোদীৰ বিমুদ্ৰাকৰণৰ সিদ্ধান্তই সমগ্ৰ দেশক ব্যতিব্যস্ত কৰি তুলিছিল আৰু দেশৰ অৰ্থনীতিতো এই সিদ্ধান্তৰ বিৰূপ প্ৰভাৱ পৰাটো স্পষ্ট হৈ পৰিছিল। ৰাহুল গান্ধীয়েও এই পৰিসংখ্য প্ৰকাশ কৰি প্ৰধানমন্ত্ৰী মোদীক সমালোচনা কৰিছে। তেওঁ সংবাদ মাধ্যমত প্ৰকাশ পোৱা বাতৰি সংলগ্ন কৰি দি ছ’চিয়েল মিডিয়াত অভিযোগ কৰিছে যে, বিমুদ্ৰাকৰণৰ একমাত্ৰ সফলতা হৈছে দেশৰ অৰ্থনীতিক বিধ্বস্ত কৰি তোলা।

 

তেওঁ সংলগ্ন কৰি দিয়া বাতৰিটোত উল্লেখ আছে যে, দেশত এতিয়া জাল ৫০০ টকীয়া নোটৰ সংখ্যা ১০০শতাংশ বাঢ়িছে। আনহাতে ২০০০ টকীয়া জাল নোটৰ সংখ্যা বাঢ়িছে ৫৪০ শতাংশ। অৰ্থাৎ প্ৰকাৰান্তৰে বিমুদ্ৰাকৰণৰ ব্যৰ্থতাকে প্ৰতিপন্ন কৰিছে এই পৰিসংখ্যাই। 

 

সংবাদ মাধ্যমত প্ৰকাশিত তথ্য অনুসৰি বিমু্দ্ৰকৰণৰ সময়ত দেশৰ ৭০জনৰো অধিক লোকৰ মৃত্যু হৈছিল৷ অথচ, তেওঁলোকৰ কি দোষ আছিল? বিমুদ্ৰাকৰণৰ বাবে তেওঁলোকৰ মৃত্যু হৈছিল। আনকি পৰিস্থিতি পিছত উন্নত হ’লেও কোনোদিনে ঘূৰি নহাৰ বাটেৰে তেওঁলোক গুচি গৈছিল৷

 

বিমুদ্ৰাকৰণে দেশবাসীক কি দিলে কি নিদলে সেই উত্তৰ দিবলৈ এতিয়া প্ৰধানমন্ত্ৰী তথা বিজেপি অপাৰগ৷ বিদেশৰ পৰা ক’লাধন ঘূৰাই অনাৰ প্ৰতিশ্ৰুতি দিয়া এইগৰাকী প্ৰধানমন্ত্ৰীৰ কাৰ্যকালতে কোটি কোটি টকাৰ ঋণ লৈ দেশ এৰি পলায়ন কৰিছে পুঁজিপতি ধনকুবেৰে৷ এইগৰাকী প্ৰধানমন্ত্ৰীৰ কাৰ্যকালতে টকাৰ মূল্য চূড়ান্ত পৰ্যায়ত অৱনমিত হৈছে৷ বিমুদ্ৰাকৰণে জোকাৰি যোৱা অৰ্থনীতি আজিও সুস্থিৰ হোৱা নাই বুলি দেশৰ অৰ্থনৈতিক বিশ্লেষকসকলে মন্তব্য কৰি আহিছে৷ আৰু এনেসময়তে পোহৰলৈ আহিল বেংকত জমা হোৱা ৮৭.১%ই হৈছে জালনোট৷