প্ৰধানমন্ত্ৰী মোদীৰ মুখত পুৰীৰ জগন্নাথ মন্দিৰৰ ৰহস্যময় ৰত্ন ভাণ্ডাৰৰ কথা, কি আছে সেই ৰত্ন ভাণ্ডাৰত? কিয় কোনেও খুলিব পৰা নাই সেই ৰত্ন ভাণ্ডাৰ?

১৯৭০ ৰ দশকৰ শেষৰ ফালে সকলো অলংকাৰ গণনা কৰা হৈছিল।  পুৰীৰ জগন্নাথ মন্দিৰৰ ৰত্ন ভাণ্ডাৰ  ১৯৭৮ চনত এবাৰ  খোলা হৈছিল। ১৯৮৪  চনত জগন্নাথৰ মূৰত থকা গহনা  ভাঙি যোৱাৰ পিছত  অন্তিমবাৰৰ বাবে ৰত্ন ভাণ্ডাৰ খোলা হৈছিল। সেই সময়ত ৰত্ন ভাণ্ডাৰৰ পৰা  পৰা জগন্নাথৰ মুকুটৰ বাবে  কিছু  সোণ লোৱা হৈছিল। তাৰ পিছত ৰত্ন ভাণ্ডাৰটো খোলাৰ কোনো প্ৰয়োজন হোৱা নাছিল।

ৰত্ন ভাণ্ডাৰত প্ৰায় ১৫০ বিধ  সোণৰ অলংকাৰ আছে, যাৰ ভিতৰত আছে জগন্নাথ, বলৰাম আৰু সুভদ্ৰাৰ সোণৰ মুকুট। ৰত্ন ভাণ্ডাৰত থকা সম্পদৰ  তালিকা তৈয়াৰ হোৱাৰ প্ৰায় ১০০ বছৰ পাৰ হৈ গৈছে। অৱশ্যে ইয়াৰ মাজতে অলংকাৰৰ পৰিমাণ যথেষ্ট বৃদ্ধি পাইছে। অলংকাৰৰ সঠিক পৰিমাণ এতিয়া অস্পষ্ট,  কিয়নো বহু বছৰ ধৰি ৰত্ন ভাণ্ডাৰত কোনেও প্ৰৱেশ কৰিব পৰা নাই।  ৰত্ন ভাণ্ডাৰৰ মাত্ৰ ১০ শতাংশ  গহনাহে ভগৱান জগন্নাথক পৰিধান কৰোৱা হৈছে। ২০১৮  চনত ওড়িশা উচ্চ ন্যায়ালয়ে ভাৰতীয় পুৰাতাত্ত্বিক জৰীপ (এএছআই)বিভাগক ৰত্ন ভাণ্ডাৰৰ দুৱাৰ খুলি ৰত্ন ভাণ্ডাৰৰ মজিয়া, চাল আৰু দেৱালৰ অৱস্থা পৰীক্ষা কৰিবলৈ  অনুমতি দিছিল। অৱশ্যে  ভাৰতীয় পুৰাতাত্ত্বিক জৰীপ, ওড়িশা চৰকাৰ আৰু জগন্নাথ মন্দিৰৰ প্ৰতিনিধিসকলে ৰত্ন ভাণ্ডাৰত উপস্থিত হ'ব নোৱাৰিলে।

 তেতিয়াই জনা গৈছিল যে ৰত্ন ভাণ্ডাৰৰ  চাবি  হেৰাইছে । পুৰীত ভগৱান জগন্নাথৰ ৰত্ন ভাণ্ডাৰৰ দুৱাৰৰ তলা  খুলিবলৈ মুঠ ৩ পাত  চাবিৰ প্ৰয়োজন। এপাত  চাবি গজপতি ৰজাৰ সৈতে, এপাত  চাবি মন্দিৰৰ পৰিচালনা সমিতিৰ ওচৰত  থাকে। তৃতীয় চাবিপাত  পুৰীৰ জিলা দণ্ডাধীশৰ দায়িত্বত আছে। এই তৃতীয় চাবিপাতেই হেৰাইছে। সেইবাবেই আদালতৰ অনুমতিৰ পিছতো পুৰীৰ জগন্নাথ মন্দিৰৰ ৰত্ন ভাণ্ডাৰৰ দুৱাৰ খুলিব পৰা হোৱা নাই।

প্ৰধানমন্ত্ৰীয়ে তৃতীয় চাবিপাত  হেৰুওৱাৰ ৰহস্যৰ বিষয়ত  প্ৰশ্ন উত্থাপন কৰিছে। এই ক্ষেত্ৰত ওড়িশাৰ বিজেডি চৰকাৰৰ ভূমিকাকলৈ মোদীয়ে সন্দেহ প্ৰকাশ কৰিছে।