ডিজিটেল ডেস্কঃ প্ৰেমত সৰু সৰু কথাত মানুহৰ মাজত কাজিয়া হয়, কিন্তু আপুনি কল্পনা কৰিব পাৰেনে যে চিপছ্ক লৈও এহাল প্ৰেমিক-প্ৰেমিকাৰ মাজত দুৰ্বাদল কাজিয়া লাগিব পাৰে আৰু সেই বিষয়টো গৈ আদালতৰ মজিয়া পাব পাৰে... শুনি আচৰিত লাগিছে নহয়নে? পাছে এই কথা শুনি আপোনাৰ চকু কপালত উঠিলেও এই কথাই সত্য।
ঘটনা অনুসৰি এহাল প্ৰেমিক-প্ৰেমিকা গাড়ীৰে ফুৰিবলৈ গৈ আছিল। তাৰ মাজতে চিপছ্ৰ পেকেট এটা খুলি চিপছ্ খালে প্ৰেমিকাই। প্ৰেমিকাই খাই থকা চিপছ্ৰ পেকেটৰ পৰা এটুকুৰা মুখত ভৰালে প্ৰেমিকে। তাতেই যেন ভয়ংকৰ অপৰাধ কৰিলে প্ৰেমিকজনে। প্ৰেমিকে এটুকুৰা চিপছ লৈ খোৱা দেখি প্ৰেমিকা খঙত টিঙিৰিতুলা হৈ উঠে। খঙৰ কোবত প্ৰেমিকাই প্ৰেমিকক গাড়ীৰ পৰা গতিয়াই পেলাই দিয়ে আৰু তেওঁৰ গাৰ ওপৰেৰে গাড়ী চলাবলৈ চেষ্টা কৰে। কোনোমতে প্ৰাণ বচাই পলাই সাৰে প্ৰেমিক।
এই অদ্ভূত ঘটনাটো সংঘটিত হৈছে অষ্ট্ৰেলিয়াৰ এডিলেইডত।
এডিলেইড মেজিষ্ট্ৰেট আদালতত প্ৰেমিকা চাৰ্লট হেৰিছনৰ বিৰুদ্ধে অভিযোগ উত্থাপন কৰে প্ৰেমিক মেথিউ ফিনে। ফিনে আদালতত কয় যে তেওঁ প্ৰেমিকাৰ পৰা চিপছ্ এপিচ খোৱাৰ পাছতেই সকলো সলনি হৈ গ’ল। তেওঁক গাড়ীৰ পৰা ঠেলি উলিয়াই হত্যাৰ চেষ্টা চলায় উদ্ভট প্ৰকৃতিৰ প্ৰেমিকাই।
অৱশ্যে প্ৰেমিকা চাৰ্লট হেৰিছনে তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰিছে। তেওঁ কয় যে এই কাণ্ড কেৱল এক দুৰ্ঘটনাহে আছিল। প্ৰেমিকা চাৰ্লটে কয় যে প্ৰেমিক মেথিউ ফিনে তেওঁক আক্ৰমণ কৰিছিল। সেইবাবে তেওঁ গাড়ীখন ৰখাইছিল আৰু ফিনক বাহিৰলৈ উলিয়াই দিছিল। কেৱল এয়াই নহয়, তেওঁ নিজেই ইয়াৰ অভিযোগ দিবলৈ আৰক্ষী চকীলৈ আহিব বিচাৰিছিল, কিন্তু বাটত তেওঁৰ গাড়ীখন বিপৰীত দিশৰ পৰা অহা বাহনৰ সৈতে খুন্দা খায় আৰু এই দুৰ্ঘটনাটো সংঘটিত হয়।
এতিয়া আৰক্ষীৰ তদন্ততহে গম পোৱা যাব কোন সঁচা...কোন মিছা....
Continue Reading
