প্ৰেমিকক সুস্থ কৰিবলৈ কিডনী দান প্ৰেমিকাৰ; সুস্থ হৈ প্ৰেমিকাৰ সৈতে সম্পৰ্ক ছেদ প্ৰেমিকৰ

ডিজিটেল ডেস্কঃ প্ৰেমক স্বৰ্গীয় অনুভৱ বুলি কোৱা হয় কিন্তু কেতিয়াবা কিছুমান মানুহে এই স্বৰ্গীয় অনুভৱক যেন নৰক সদৃশ কৰি তোলে। প্ৰেমত ঠগ-প্ৰৱঞ্চনাৰ ঘটনা সঘনাই শুনিবলৈ পোৱা যায়। এগৰাকী যুৱতী এনেদৰে প্ৰতাৰিত হ'ল যে সেই কাহিনী শুনি কঠিন হৃদয়ৰ লোকো আৱেগিক হৈ পৰিছে। কেলিফৰ্নিয়াৰ কোলীন লী নামৰ ৩০ বছৰীয়া যুৱতীগৰাকীয়ে প্ৰেমিকক সুস্থ কৰি তুলিবলৈ নিজৰ কিডনী দান কৰিছিল। কোলীন লী এগৰাকী জনপ্ৰিয় টিকটকাৰ। অস্ত্ৰোপচাৰৰ জৰিয়তে কোলীনৰ এটা কিডনী প্ৰেমিকৰ শৰীৰত সংৰোপণ কৰা হৈছিল। প্ৰেমিকাৰ কিডনী সংৰোপণ হোৱাৰ পিছত লাহে লাহে সুস্থ হৈ উঠিছিল প্ৰেমিক। কোলীন লীয়ে নিজৰ প্ৰেমৰ বাবে ইমানখিনি ত্যাগ কৰাৰ পাছতো যেন প্ৰেমৰ মূল নুবুজিলে প্ৰেমিকজনে। সুস্থ হৈ উঠাৰ সাত মাহৰ পাছতে প্ৰেমিকে কোলীনৰ সৈতে সম্পৰ্ক ছেদ কৰে। কোলীনক এনেদৰে প্ৰতাৰণা কৰিবলৈ এবাৰলৈ হ'লেও হৃদয় নকঁপিল প্ৰেমিকৰ। কোলীনে নিজৰ এই কাহিনী টিকটকৰ মাধ্যমেৰে সকলোকে জনোৱাৰ পাছতে শেহতীয়াকৈ এই বিষয়টো ভাইৰেল হৈ পৰিছে। কোলীনে জনোৱা মতে ২০১৫ চনত তেওঁলোকৰ মাজত প্ৰেমৰ সম্পৰ্ক আৰম্ভ হৈছিল। তেওঁৰ প্ৰেমিক দীৰ্ঘম্যাদী বৃক্কৰ ৰোগত আক্ৰান্ত আছিল,যাৰ ফলত তেওঁক মাত্ৰ ১৭ বছৰ বয়সত ডায়েলাইচিছৰ প্ৰয়োজন হৈছিল। প্ৰেমিকৰ কিডনীয়ে মাত্ৰ ৫%হে কাম কৰিব পাৰিছিল। মৃত্যুমুখী প্ৰেমিকক সুস্থ কৰি তুলিবলৈ প্ৰেমিকক এটা কিডনী দান দিয়াৰ সিদ্ধান্ত গ্ৰহণ কৰে কোলীনে। ২০১৬ চনত কিডনীৰ অপাৰেশ্যন হয় আৰু অপাৰেশ্যনৰ ঠিক ৭ মাহৰ পিছতে কোলীনৰ সৈতে সম্পৰ্ক ছেদ কৰে প্ৰতাৰক প্ৰেমিকে। এজন বন্ধুৰ বেচ্চলৰ পাৰ্টীত অংশ ল'বলৈ লাচ বেগাচলৈ গৈছিল প্ৰেমিক আৰু তাৰ পিছতে কোলীনৰ সৈতে তেওঁ সম্পৰ্ক ছেদ কৰে। তাৰ পৰা মেছেজ কৰি কোলীনৰ সৈতে বিচ্ছেদ হোৱাৰ কথা কয় প্ৰেমিকে। কোলীনে কোৱা অনুসৰি তেওঁৰ প্ৰেমিকে কোলীনক ছ'চিয়েল মিডিয়াৰ সকলোতে ব্লক কৰিছিল আৰু তেওঁৰ কল আৰু মেছেজৰ কোনো উত্তৰ দিয়া নাছিল। সকলো সীমা পাৰ কৰি প্ৰেমিকে কোলীনক কৈছিল যে "তুমি মাত্ৰ নিজক ভাল বুলি বুজাবৰ বাবে কিডনী দান কৰিছিলা"। এই কথা শুনাৰ পাছত মূৰত সৰগ ভাগি পৰে কোলীনৰ। প্ৰেমিকৰ প্ৰতাৰণাত তেওঁৰ হৃদয় আজিও দগ্ধ। এই কাহিনী শুনাৰ পাছত কোলীন লীক সকলোৱে মনোবল অটুট ৰাখিবলৈ সাহস যোগাইছে। আৰু পঢ়কঃ বহু কষ্টৰে দৰিদ্ৰ কৃষকে জমা কৰিছিল ২ লাখ টকা;নিগনিয়ে কুটি কৰিলে নষ্ট