ডিজিটেল ডেস্কঃ এজনী ছোৱালীয়ে কান্দি কান্দি ফোনত পুলিচক ক’লে- "ছাৰ, মোৰ প্ৰেমিকজনে মোক এৰি পলাই গৈছে। অনুগ্ৰহ কৰি তাক বিচাৰি উলিয়াওক।" কৰ্তব্যৰত আৰক্ষী বিষয়াজনে এনে অনুৰোধ শুনি অলপ হতভম্ব হৈ পৰিল। যুৱতীগৰাকীক সান্ত্বনা দিবলৈ লওঁতেই পুনৰ ছোৱালীজনীয়ে তেওঁক ক’লে- "ছাৰ, মোৰ লগত তেওঁ কিয় ব্ৰেকআপ কৰিলে, সেই কথাটো তাক সুধিবচোন!"
চীনৰ ঝেজিয়াং প্ৰদেশত সংঘটিত হৈছে এই ঘটনা। চাউথ চাইনা মৰ্নিং পোষ্টত প্ৰকাশিত এক বাতৰি অনুসৰি, যুৱতীগৰাকীৰ এজন যুৱকৰ স’তে ৬ বছৰীয়া সম্পৰ্ক আছিল। কিন্তু যুৱকজনে হঠাতে সেই সম্পৰ্ক ভাঙি পেলালে। সেই যুৱক তথা প্ৰেমিকজনৰ পৰা কোনো উত্তৰ নোপোৱাৰ পিছত যুৱতীগৰাকীয়ে আৰক্ষীক ফোন কৰে।
যুৱতীগৰাকীৰ সকলো কথা শুনি পুলিচ বিষয়াজনে প্ৰথমে ক'লে, "প্ৰেমিকজনক বিচাৰি উলিওৱাটো খুব জৰুৰী নেকি?" এই কথা শুনি ছোৱালীজনীয়ে আকৌ কান্দিবলৈ ধৰিলে। ক'লে- "মই বুজিব পৰা নাই তেওঁ মোৰ লগত কিয় এনে ব্যৱহাৰ কৰিলে! সেইটোৱেই মই জানিব বিচাৰো।"
পুলিচ বিষয়াজনে তেতিয়া যুৱতীগৰাকীক সুধিলে, "বাৰু, যদি তেওঁ আগতেও ইমান বেয়া ব্যৱহাৰ কৰি আহিছে, তেন্তে তাৰ পিছতো তেওঁৰ লগত পুনৰ সম্পৰ্ক স্থাপন কৰিব বিচাৰে নেকি আপুনি? তাৰ পৰিৱৰ্তে তেওঁৰ মোবাইল নম্বৰটো ব্লক কৰক। তেওঁৰ লগত সকলো সম্পৰ্ক কাটি পেলাওক। আপোনাৰ নিজৰ মংগলৰ বাবেই এনে হৈছে বুলি ভাবি লওক।”
আৰক্ষীৰ এই উত্তৰ শুনি ছোৱালীজনীও হতভম্ব হৈ পৰে। কৰ্তব্যৰত আৰক্ষী বিষয়াজনে ফোন কলটোত দিয়া উত্তৰ এতিয়া ছ’চিয়েল মিডিয়াত ভাইৰেল হৈ পৰিছে।
Continue Reading
