ডিজিটেল ডেস্কঃ এগৰাকী বৃদ্ধাৰ শেহতীয়াকৈ ভাইৰেল হৈ পৰা এক ভিডিঅ’ই দেশক জোকাৰি গৈছে৷ ভিডিঅ’টো চাই আনকি প্ৰতিক্ৰিয়া ব্যক্ত কৰিছে খোদ কেন্দ্ৰীয় বিত্তমন্ত্ৰী নিৰ্মলা সীতাৰমণেও৷ এগৰাকী বৃদ্ধাই পেঞ্চনৰ আশাতে কেইবা কিলোমিটাৰ পথ খালী ভৰিৰে প্ৰচণ্ড ৰ’দৰ মাজৰে যাত্ৰা কৰিবলগীয়া হোৱা কথাই বহুতকে চিন্তিত কৰি তুলিছে৷
৭০ বছৰীয়া বৃদ্ধাগৰাকীয়ে খালী ভৰিৰে কেইবা কিলোমিটাৰ খোজ কাঢ়ি যোৱাৰ ভিডিঅ' বৰ্তমান ভাইৰেল হৈ পৰিছে। মহিলাগৰাকীয়ে পেঞ্চনৰ বাবেই এনেদৰে খোজকাঢ়ি বেংকলৈ গৈছে। ঘৰৰ পৰা কেইবা কিলোমিটাৰ দূৰত আছে তেওঁৰ নিদিষ্ট বেংকটো, বেংকলৈ যাবলৈ ভঙা চকীখনেই সূৰ্য হৰিজন নামৰ মহিলাগৰাকীৰ একমাত্ৰ সহায়।
ভঙা চকী এখনৰ সহায় লৈ কেইবা কিলোমিটাৰ খালী ভৰিৰে খোজ কাঢ়িব লগা হৈছে এই উৎকট ৰ’দত।ঘটনাটো ঘটিছে ওড়িশাৰ নবাৰংপুৰ জিলাৰ ঝাৰিগাঁৱত৷সূৰ্য্য হৰিজন নামৰ এগৰাকী বৃদ্ধা বৰ দৰিদ্ৰ। তেওঁৰ ডাঙৰ পুত্ৰই আন এখন ৰাজ্যত প্ৰব্ৰজিত শ্ৰমিক হিচাপে কাম কৰি আছে। যদিও মহিলাগৰাকীয়ে পেঞ্চন সংগ্ৰহ কৰিবলৈ বেংকলৈ গৈছিল। ইফালে তেওঁৰ আঙুলিৰ ছাপ বেংকৰ ৰেকৰ্ডৰ সৈতে মিল নাই বুলি বেংকত কোৱা হৈছিল, আৰু সেয়ে তেওঁ ঘৰলৈ উভতি যাবলৈ বাধ্য হৈছিল।
এই ভিডিঅ’ ভাইৰেল হোৱাৰ পিছতে কেন্দ্ৰীয় বিত্তমন্ত্ৰী নিৰ্মলা সীতাৰমণে টুইটাৰত প্ৰতিক্ৰিয়া ব্যক্ত কৰিছে৷ বিত্ত মন্ত্ৰী সীতাৰমণে টুইটাৰত ওড়িশাৰ বৃদ্ধাগৰাকীৰ ভিডিঅ' শ্বেয়াৰ কৰি লিখিছে, "ভাৰতীয় ষ্টেট বেংকৰ (এছবিআই) মেনেজাৰে এই ক্ষেত্ৰত সঁহাৰি জনাইছে, কিন্তু তথাপিও বিত্তীয় সেৱা বিভাগ (ডিএফএছ) আৰু এছবিআইয়ে এনে ধৰণৰ ঘটনা দ্ৰুত বিবেচনা কৰিব আৰু মানৱীয় ভাৱে কাম কৰিব বুলি আশা কৰিছো।" শেহতীয়াকৈ জানিব পৰা মতে মহিলাগৰাকীক বেংকৰ পৰা ৩ হাজাৰ টকা দিয়া হৈছে। বৃদ্ধাগৰাকীৰ কৰুণ কাহিনীৰ বিষয়ে প্ৰাগ ডিজিটেলৰ ফেচ অব দ্য ডেত শিতানএক বিশেষ খবৰো প্ৰকাশ কৰা হৈছে৷
Continue Reading
