ডিজিটেল ডেস্কঃ ইন্ধনজাত সামগ্ৰীৰ মূল্যবৃদ্ধিত জুৰুলা দেশৰ সৰ্বসাধাৰণ। বিগত কেইদিনমানত হোৰা হোৰে বৃদ্ধি পাইছে পেট্ৰ'লৰ মূল্য। পেট্ৰ’লৰ সমান্তৰালকৈ বৃদ্ধি পাইছে ডিজেলৰ মূল্যও। ৰন্ধন গেছৰ মূল্যও আকাশচুম্বী। বলীউড ছুপাৰষ্টাৰ অমিতাভ বচ্চন আৰু অক্ষয় কুমাৰে এই মূল্যবৃদ্ধিৰ বিৰুদ্ধে কিয় মাত মতা নাই? এই প্ৰশ্ন উত্থাপন কৰিয়েই মধ্য প্ৰদেশত দুয়োজন তাৰকাৰ প্ৰতিমূৰ্তি দাহ কৰে সাধাৰণ জনতাই।
অমিতাভ বচ্চন আৰু অক্ষয় কুমাৰৰ ফটোৰে ৰাজপথৰ মাজত পুত্তলিকা দাহ কৰা বুলি সংবাদ মাধ্যমত প্ৰকাশ পাইছে। জানিবলৈ পোৱা মতে, মধ্য প্ৰদেশত কংগ্ৰেছে এই পদক্ষেপ গ্ৰহণ কৰিছে। এই সন্দৰ্ভত ক’বলৈ গৈ কংগ্ৰেছ বিধায়ক পি চি শৰ্মাই কয়, ‘২০১২ চনত ইন্ধনজাত সামগ্ৰীৰ মূল্য বৃদ্ধিক লৈ দুই তাৰকাই টুইট কৰিছিল। পেট্ৰ'ল আৰু ডিজেলৰ মূল্য তেতিয়া প্ৰায় ৬০ টকা আছিল। আৰু ৰন্ধন গেছৰ মূল্য আছিল ৩০০ ৰ পৰা ৪০০ টকা। কিন্তু এতিয়া পেট্ৰ'ল আৰু ডিজেলৰ মূল্যই শতকৰ ঘৰ অতিক্ৰম কৰিছে। আনহাতে, ৰন্ধন গেছৰ মূল্যও ১০০০টকা। তথাপি তেওঁলোকৰ কাৰো কোনো প্ৰতিক্ৰিয়া নাই।’
মধ্যপ্ৰদেশত কংগ্ৰেছৰ তত্পৰতাত সংঘটিত এনে কাণ্ডক তীব্ৰ গৰিহণা দিছে বিজেপিয়ে। বিৰোধীৰ এনে কাৰ্যক শাসকদলে দুৰ্ভাগ্যজনক আখ্যা দিছে। গেৰুৱা শিবিৰে কয়, ‘যেতিয়াঅমিতাভ বচ্চন কংগ্ৰেছৰ পক্ষত আছিল, তেতিয়া তেওঁৰ বিৰুদ্ধে তেওঁলোকে একোকে কোৱা নাছিল। কংগ্ৰেছ ত্যাগ কৰাৰ পাছৰে পৰা বিগ-বিয়ে আক্ৰমণৰ সন্মুখীন হ’বলগীয়া হৈছে। অৱশ্যে, এতিয়ালৈকে এই বিষয়টোক লৈ অমিতাভ বচ্চন বা অক্ষয় কুমাৰে কোনো ধৰণৰ মন্তব্য প্ৰকাশ কৰা নাই।
মন কৰিবলগীয়া যে, প্ৰাপ্ত তথ্য অনুসৰি শনিবাৰে মধ্যপ্ৰদেশত প্ৰতি লিটাৰ পেট্ৰ'ল আৰু ডিজেলৰ মূল্য ১০০ তকৈও অধিক। শনিবাৰে কলকাতাত প্ৰতি লিটাৰ পেট্ৰ'লৰ মূল্য ১১৫ টকা ১২ পইছা। এক লিটাৰ ডিজেল ৯৯.৮৩ টকাত বিক্ৰী হৈছে মধ্যপ্ৰদেশত।
Continue Reading
