ডিজিটেল ডেস্কঃ পিঁয়াজৰ আকাশলংঘী দাম! পিঁয়াজৰ দাম ইমানেই বেছি হৈছে যে এই দাম এতিয়া চিকেনৰ দামতকৈ তিনিগুণ বেছি হৈছে। চিকেনতকৈ পিঁয়াজৰ দাম তিনিগুণ বেছি হৈছে ফিলিপাইনছত। দেশ খনত এক কিলোগ্ৰামৰ মূল্য হৈছে ৯০০ টকা!
পৃথিৱীৰ বহুতো দেশে এতিয়া বৰ্ধিত মুদ্ৰাস্ফীতিৰ সৈতে যুঁজি আছে। মুদ্ৰাস্ফীতিৰ অৱস্থা এনে হৈছে যে ফিলিপাইনছত পিঁয়াজৰ মূল্য আকাশচুম্বী হৈ আছে। দেশ খনৰ সংবাদ মাধ্যমৰ বাতৰি অনুসৰি ফিলিপাইনছত এক কেজি পিয়াজ ৯০০ টকাত বিক্ৰী হোৱাৰ বিপৰীতে এক কিলোগ্ৰাম চিকেনৰ মূল্য হৈছে ৩২৫ টকা। ফলত ফিলিপাইনছত পিঁয়াজৰ চোৰাং ব্যৱসায় আৰম্ভ হৈছে।শেহতীয়াকৈ চীনৰ পৰা চোৰাংকৈ অনা পিঁয়াজ ফিলিপাইনছৰ কাষ্টম বিষয়াসকলে জব্দ কৰি আহিছে। যোৱা বছৰৰ ডিচেম্বৰত, কাষ্টম বিষয়াসকলে কাপোৰৰ সৈতে চোৰাংকৈ অনা প্ৰায় ২.৫ কোটি টকাৰ পিয়াজ জব্দ কৰিছিল।
উল্লেখ্য যোৱা বছৰ ফিলিপাইনছত হোৱা কেইবাটাও ধুমুহাৰ ফলত কোটি কোটি টকাৰ পিঁয়াজৰ খেতি ধ্বংস হৈছিল। ফলত দেশ খনত পিঁয়াজৰ অভাৱ হৈছে। পিঁয়াজ ফিলিপাইনছৰ লোকসকলৰ আহাৰৰ এক গুৰুত্বপূৰ্ণ অংশ। তাত থকা লোকসকলে প্ৰতি মাহে প্ৰায় ২০,০০০ মেট্ৰিক টন পিয়াজ খায়। ইমান চাহিদা থকা বাবেই পিঁয়াজৰ যোগানৰ অভাৱত ইয়াৰ মূল্য আকাশলংঘী হৈ পৰিছে। ইপিনে ফিলিপাইনছত সামগ্ৰীক মুদ্ৰাস্ফীতিৰ হাৰ ১৪ শতাংশলৈ বৃদ্ধি হৈছে। ফিলিপাইনছৰ চৰকাৰে পৰিস্থিতি স্বাভাৱিক কৰিবলৈ ২১,০০০ টন পিয়াজ আমদানি কৰাৰ সিদ্ধান্তত অনুমোদন জনাইছে।
Continue Reading
