ডিজিটেল ডেস্কঃ নিজৰ পিতৃ-মাতৃক অপমান কৰাটোকো সহজে লোৱা হ’ব, কিন্তু প্ৰধানমন্ত্ৰী আৰু গৃহমন্ত্ৰীৰ বিৰুদ্ধে এটা শব্দও গ্ৰহণ কৰা নহ’ব। এইদৰে এক চাঞ্চল্যকৰ বক্তব্যৰে চৰ্চালৈ আহিছে মহাৰাষ্ট্ৰৰ এগৰাকী মন্ত্ৰী চন্দ্ৰকান্ত পাটিল।
পুনেৰ এটা অনুষ্ঠানত অংশ লৈ পাটিলে কয় যে মহাৰাষ্ট্ৰৰ কোলহাপুৰৰ লোকসকলে নিজৰ পিতৃ-মাতৃক অপমান কৰাটোও গ্ৰহণ কৰে, কিন্তু প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহৰ বিৰুদ্ধে এটা শব্দও সহ্য নকৰে।
পাটিলৰ এই বক্তব্যৰ পাছতে বিৰোধী দলসমূহে তেওঁক তীব্ৰভাৱে সমালোচনা কৰিছে। বিৰোধী দলসমূহে কয় যে পাটিলে নিজৰ নেতাক প্ৰশংসা কৰিছে, সেইটো ঠিকে আছে। কিন্তু নিজৰ বিতৰ্কিত বক্তব্যৰে সমগ্ৰ কোলহাপুৰ আৰু মহাৰাষ্ট্ৰক অপমান কৰিছে। বিৰোধী দল এনচিপিয়ে কয় যে নিজৰ পিতৃ-মাতৃক অপমান কৰাটো কোনোপধ্যে গ্ৰহণযোগ্য হ’ব নোৱাৰে।
পাটিলৰ মন্তব্যক শিৱ সেনাইও সমালোচনা কৰিছে। দলটোৱে কয় যে পাটিলৰ মন্তব্যটোৱে বিজেপিৰ চৰিত্ৰ উদঙাই তুলিছে। নিজৰ পিতৃ-মাতৃক অপমান কৰাটোৱে বিজেপিৰ হিন্দুত্ব বুলি শিৱসেনাই কটাক্ষ কৰে।
উল্লেখযোগ্য যে ইয়াৰ পূৰ্বেও পাটিলে বিভিন্ন সময়ত আপত্তিজনক মন্তব্য প্ৰদান কৰি আহিছে। কিছুদিন পূৰ্বে এনচিপি সাংসদ সুপ্ৰীয়া চুলেৰ ওপৰত নাৰীবিদ্বেষী মন্তব্য কৰিছিল। কৈছিল যে চুলেই ঘৰৰ ভিতৰত খাদ্য ৰান্ধি আৱ্দ্ধ হৈ থকা উচিত।
Continue Reading
