প্ৰকাশৰ পূৰ্বেই ৰতন টাটাৰ জীৱনীক লৈ উৎসুকতা

ডিজিটেল ডেস্কঃ বিশ্বৰ প্ৰখ্যাত উদ্যোগপতি ৰতন টাটাৰ জীৱনীমূলক গ্ৰন্থ, ৰতন এণ্ড টাটা: দ্য অথৰাইজড বায়োগ্ৰাফী নামৰ কিতাপখন এইবছৰৰ নৱেম্বৰ মাহত প্ৰকাশ পাব। হাইপাৰকলিন্স নামৰ ব্ৰিটিছ প্ৰকাশন সন্থা এটাই কিতাপখন সকলো মাধ্যমতে প্ৰকাশ কৰাৰ বাবে চুক্তিবদ্ধ হৈছে।

ব্ৰিটিছ প্ৰকাশন সন্থাটোৱে জনোৱা মতে ৰতন টাটাৰ কৰ্তৃত্বপ্ৰাপ্ত জীৱনী ৰতন এণ্ড টাটা: দ্য অথৰাইজড বায়োগ্ৰাফী প্ৰকাশ কৰাৰ অধিকাৰ তেওঁলোকে লাভ কৰিছে। ২০২২ চনৰ নৱেম্বৰত হাৰ্পাৰকলিন্সৰ দ্বাৰা বিশ্বৰ সকলো লোকে পঢ়িব পৰাকৈ সকলো ফৰ্মেটত বিশ্বব্যাপী প্ৰকাশ কৰা হ’ব। এই জীৱনী গ্ৰন্থখনত টাটাৰ নেনো প্ৰকল্প, টাটা ছন্সৰ প্ৰাক্তন অধ্যক্ষ চাইৰাছ মিস্ত্ৰীক বহিষ্কাৰ কৰা, আৰু টাটা ষ্টীল লিমিটেডৰ কোৰাছ অধিগ্ৰহণৰ দৰে ঘটনাৰ বিষয়ে আগেয়ে নোকোৱা বা লোকচক্ষুৰ আঁৰত থকা সকলো কথা সামৰি লোৱা হৈছে।

কিতাপখন বিভিন্ন পঠনযোগ্য মাধ্যম যেনে- কিতাপ আৰু ই-বুক আকাৰে প্ৰকাশ কৰাৰ উপৰি অডিঅ’ বুক হিচাপেও প্ৰকাশ কৰা হ’ব। ইয়াৰ বাবদ প্ৰকাশন প্ৰতিষ্ঠানটোৱে ২ কোটিৰো অধিক টকা খৰচ কৰিব বুলি জানিব পৰা গৈছে। যদিও প্ৰকাশনৰ বাবে হোৱা নিবিদাৰ বিজয়ী মূল্য আনুষ্ঠানিকভাৱে কোনো পক্ষই ঘোষণা কৰা নাই, তথাপি ইয়াক ২ কোটিৰ অধিক বুলি জানিব পৰা গৈছে। কিতাপখন এজন অৱসৰপ্ৰাপ্ত আইএএছ বিষয়া থমাছ মেথিউৰ দ্বাৰা ৰচনা কৰা হ’ব। কিতাপখনত ৰতন টাটাৰ জীৱনৰ প্ৰাৰম্ভিক জীৱনৰ বিচিত্ৰ ঘটনা, ছাত্ৰ জীৱনৰ বিভিন্ন আকৰ্ষণীয় কাহিনী, আমেৰিকাৰ ছাত্ৰ জীৱন আৰু তাৰ পৰা ওভটি আহি টাটা গ্ৰুপৰ সৈতে কাম-কাজ কৰাৰ প্ৰাৰম্ভিক কথাবোৰ সন্নিৱিষ্ট থাকিব।