প্ৰৱল বৃষ্টিপাত, ভূমিস্খলনত নিঃশেষ চহৰ; মৃত্যু ১১৭জন, সন্ধান নাই শতাধিকৰ

ডিজিটেল ডেস্ক : প্ৰাকৃতিক দুৰ্যোগৰ কৱলত ধ্বংসাৱশেষত পৰিণত এখন চহৰ৷ ব্ৰাজিলৰ পেট্ৰ’পলিছ চহৰত হোৱা প্ৰবল বৃষ্টিপাতৰ পাছতে বান আৰু ভূমিস্খলনে চহৰখনলৈ নমাই আনিলে বিভীষিকাৰ৷ এতিয়ালৈকে এই দুৰ্যোগত প্ৰাণ হেৰুৱাইছে ১১৭ জনে আৰু শতাধিক লোক সন্ধানহীন হৈ আছে। বতৰ বিজ্ঞানীসকলৰ মতে, অঞ্চলটোত আগন্তুক সময়ত বৰষুণৰ মাত্ৰা ৪ ছেঃ মিঃপৰ্যন্ত বৃদ্ধি পোৱাৰ সম্ভাৱনা আছে। বৃহস্পতিবাৰে সন্ধিয়া পৰ্যন্ত হোৱা প্ৰবল বৰষুণ আৰু ভূমিস্খলনৰ বাবে আবদ্ধ হৈ থকা লোকসকলৰ উদ্ধাৰ অভিযান ব্যাহত হৈ পৰে। এই দুৰ্যোগৰ চহৰখনৰ ৭০০ৰো অধিক লোকে চহৰ এৰি অন্যস্থানলৈ গৈছে৷ উল্লেখ্য যে এটা শতিকাৰ পাছত চহৰখনত হোৱা এই প্ৰাকৃতিক দুৰ্যোগৰ ভয়াৱহতাৰ দৃশ্য ইতিমধ্যে ছ'চিয়েল মিডিয়াত ভাইৰেল হৈ পৰিছে৷ পানীৰ প্ৰৱল সোঁতে উটোৱাই নিছে ইখনৰ পাছত সিখনকৈ গাড়ী, গছ-গছনিৰ লগতে ঘৰ-দুৱাৰো৷ বহু ঘৰ ধ্বংসস্তুপত পৰিণত হৈছে। এই দুৰ্যোগত মৃত্যুৰ সংখ্যা আৰু অধিক বৃদ্ধি পোৱাৰ আশংকা কৰা হৈছে। ৰিঅ’ ডি জেনেৰিঅ’ৰ গভৰ্ণৰ ক্লদিঅ কাষ্ট্ৰই বুধবাৰে এই ক্ষতিক যুদ্ধক্ষেত্ৰৰ সৈতে তুলনা কৰে। ব্ৰাজিলৰ ৰাষ্ট্ৰপতি জাইৰ বোলছ’নাৰোৱে এই দুৰ্যোগত ক্ষতি হোৱা জনসাধাৰণক সহায় কৰাৰ লগতে অঞ্চলটোৰ পুনৰ নিৰ্মাণৰ প্ৰতিশ্ৰুতি দিছে।