ডিজিটেল ডেস্ক: আন সকলো মাতৃৰ দৰে এগৰাকী মহিলাই নিজৰ শিশুটিক পলিঅ’ ভেকচিনলৈ লৈ আহিছিল৷ কিন্তু তেওঁ শিশুটোৰ জন্মৰ প্ৰমাণ-পত্ৰ দেখুৱাৱলৈ অসমৰ্থ হয়। যাৰ ফলত বিপাঙত পৰে স্বাস্থ্যকৰ্মীসকল৷ অৱশেষত আৰক্ষীৰ দুৱাৰদলি গছকিলে এই গোচৰে৷ তাৰ পাছতেই চাঞ্চল্যকৰ তথ্য পোহৰলৈ অহাত বিপাঙত পৰে আৰক্ষীও! জানিব পৰা গৈছে যে শিশুটোক সন্তানহীন মহিলা এগৰাকীয়ে ধাননি পথাৰৰ পৰা উদ্ধাৰ কৰিছিল।
ঘটনাটো কলকাতাৰ মালদাৰ ৰতুৱাত সংঘটিত হৈছিল এই ঘটনাৰ৷ জানিব পৰা গৈছে যে দহ দিনৰ পূৰ্বে স্থানীয় লোকে ৰতুৱাৰ দেৱীপুৰ অঞ্চলৰ এক ধাননি পথাৰত পৰি থকা অৱস্থাত উদ্ধাৰ কৰে শিশুটিক৷ ইয়াৰ পাছত, অঞ্চলটোৰ এগৰাকী সন্তানহীন মহিলাই শিশুটোক নিজৰ বুলি আঁকোৱালি লয়। গাঁওবাসীয়েও সেই সময়ত শিশুটোক উদ্ধাৰৰ বিষয়ে আৰক্ষী বা প্ৰশাসনক অৱগত কৰোৱা নাছিল।
অৱশেষত পলিঅ' টিকাকৰণ কেন্দ্ৰত প্ৰকৃত ঘটনা পোহৰলৈ আহে। জানিব পৰা মতে, কেন্দ্ৰটোত আশা কৰ্মীসকলে শিশুটোৰ জন্মৰ প্ৰমাণ-পত্ৰ বিছাৰিছিল। সন্তানহীন মহিলাগৰাকীয়ে তেতিয়া সকলো বিষয় কৰ্তৃপক্ষক জনায়। জানিব পৰা মতে, শিশুটোক উদ্ধাৰ কৰি আৰক্ষীয়ে ৰতুৱা গ্ৰাম্য চিকিৎসালয়লৈ প্ৰেৰণ কৰা হৈছিল।
স্থানীয় লোকসকলৰ মতে, দুমাহৰ পূৰ্বে কলকতাৰ ৰতুৱাৰ দেৱীপুৰৰ পুলবন্ধা অঞ্চলৰ একেখন গাঁৱতে আন এগৰাকী নৱজাতক কন্যা শিশুক উদ্ধাৰ কৰা হৈছিল। ছোৱালীজনীক ইতিমধ্যে চাইল্ড লাইনক গটাই দিয়া হৈছে। দুমাহৰ ভিতৰত, একেটা অঞ্চলতে নৱজাতকক উদ্ধাৰ কৰাটোৱে অঞ্চলটোত আতংকৰ সৃষ্টি কৰে।
