ডিজিটেল ডেস্কঃ ভাৰতীয় নৌসেনাৰ বিশেষ বাহিনীৰ এগৰাকী সামুদ্ৰিক কমাণ্ডোৰ শোকাৱহ মৃত্যু। পশ্চিমবংগৰ পানাগড়ত বুধবাৰে প্ৰশিক্ষণৰত অৱস্থাত শোকাৱহভাৱে মৃত্যু হয় ভাৰতীয় নৌসেনাৰ বিশেষ বাহিনীৰ সামুদ্ৰিক কমাণ্ডোগৰাকীৰ। নিহত কমাণ্ডোগৰাকীক চন্দকা গোবিন্দ বুলি চিনাক্ত কৰা হৈছে।
বিভাগীয় সূত্ৰ অনুসৰি এখন বিমানৰ পৰা পেৰা জাম্পৰ অনুশীলন চলাই থাকোতেই চন্দকা গোবিন্দে দুৰ্ভাগ্যজনকভাৱে মৃত্যুক সাবটিবলগীয়া হয়। এক টুইটযোগে ভাৰতীয় নৌসেনাই গোবিন্দৰ মৃত্যুৰ কথা সদৰী কৰে। বিভাগীয় বিষয়াৰ ভাষ্য মতে, গোবিন্দ ভাৰতীয় নৌসেনাৰ মেৰিন কমাণ্ডো ফ’ৰ্চ (মাৰ্কোছ) নামৰ এক বিশেষ বাহিনীৰ অংশ আছিল।
নৌসেনাৰ মুৰব্বী এডমিৰেল আৰ হৰি কুমাৰ আৰু নৌসেনাৰ সকলো কৰ্মীয়ে গোবিন্দৰ মৃত্যুত শোক প্ৰকাশ কৰে। নৌসেনাই টুইট কৰি কয় যে, পানাগড়ত প্ৰশিক্ষণৰ অনুশীলন কৰি থকাৰ সময়ত প্ৰাণ হেৰুৱা বিষয়া চন্দকা গোবিন্দক শ্ৰদ্ধাঞ্জলি জনাইছো আৰু শোকসন্তপ্ত পৰিয়ালটোক আন্তৰিক সমবেদনা জ্ঞাপন কৰিছো।”
কমাণ্ডোজনৰ মৃত্যুৰ উচ্চ পৰ্যায়ৰ তদন্তৰ নিৰ্দেশ দিয়া হৈছে। এই কথা সদৰী কৰিছে নৌসেনাই।
Continue Reading
