ডিজিটেল ডেস্কঃ প্ৰথমে পত্নীক গুলীয়াই হত্যা কৰিলে আৰু তাৰ পিছত শেষত নিজেও গুলীয়াই আত্মহত্যা এজন বিজেপি নেতাই। বৃহস্পতিবাৰে বিহাৰৰ মুংগাৰত সংঘটিত হয় এই হৃদয় বিদাৰক ঘটনা। বিজেপি নেতাজনৰ নাম অৰুণ যাদৱ। তেওঁ বিজেপিৰ অ’বিচি মৰ্চাৰ উপ-সভাপতি আছিল। ঘটনাটো কোটোৱালী থানা এলেকাৰ লাল দৰৱাজা অঞ্চলৰ। এই ঘটনাৰ তথ্য অঞ্চলটোত জুইৰ দৰে বিয়পি পৰাত অৰুণ যাদৱৰ ঘৰত জনসমাগম হয়।
ঘটনা সন্দৰ্ভত তথ্য লাভ কৰাৰ লগে লগে আৰক্ষীয়ে ঘটনাস্থলীত উপস্থিত হয় আৰু সেই স্থানৰ পৰা দুটা দেশত নিৰ্মিত পিষ্টল উদ্ধাৰ কৰে।অৰুণ যাদৱৰ ঘৰৰ পৰা গুলীবৰ্ষণৰ শব্দ অহাত স্থানীয় লোকবোৰ আতংকিত হৈ পৰিছিল।
আতংকিত ৰাইজে লগে লগে ঘৰলৈ আহে যদিও স্বামী আৰু পত্নী দুয়োৰে মৃতদেহ মাটিত পৰা থকা অৱস্থাত উদ্ধাৰ হয়। দুয়োটা মৃতদেহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰা হৈছে। ঘটনাৰ কাৰণ এতিয়াও জানিব পৰা হোৱা নাই। সম্প্ৰতি ঘটনাৰ প্ৰতিটো কথাই তদন্ত কৰি আছে আৰক্ষীয়ে। লাভ কৰা তথ্য অনুসৰি বিজেপি নেতাগৰাকীৰ পত্নীৰ মাজত কিবা এটা বিষয়ক লৈ বিবাদ চলি আছিল।
জানিব পৰা মতে মুংগেৰ পৌৰ নিগমৰ হৈ হ’বলগীয়া নিৰ্বাচনত তেওঁৰ পত্নী মেয়ৰ পদৰ বাবে সম্ভাৱ্য প্ৰাৰ্থী আছিল। ওচৰ-চুবুৰীয়াই কয় যে ৰাজনৈতিক উচ্চাকাংক্ষাৰ বাবেই আগতে দুয়োৰে মাজত বিবাদ হৈছিল। এই ঘটনাৰ আঁৰৰ কাৰণ সেয়াও হ’ব পাৰে বুলি সন্দেহ কৰা হৈছে। অৱশ্যে এই বিষয়টোৰ তদন্তত নিয়োজিত হৈ আছে আৰক্ষী।
Continue Reading
