ডিজিটেল ডেস্কঃ কৰৱা চৌথৰ আনন্দৰ মাজতে এটা পৰিয়ালৰ মাজলৈ নামি আহিল কাল অমানিশা। পঞ্জাৱৰ লুধিয়ানাৰ খান্নাত সংঘটিত হৈছে এক কৰুণ ঘটনা। পত্নীয়ে কৰৱা চৌথৰ ব্ৰত ভংগ কৰাৰ পূৰ্বেই স্বামীয়ে পৃথিৱীৰ পৰা ল’লে চিৰবিদায়।
মহিলাগৰাকীৰ স্বামী লখৱিন্দৰ ৰামে পত্নীৰ ব্ৰত ভাঙিবলৈ চন্দ্ৰ চাবলৈ ঘৰৰ চাদলৈ গৈছিল। এই সময়ছোৱাত চিৰিৰ পৰা লখৱিন্দৰ ৰামৰ ভৰিখন পিছলি গ’ল, যাৰ বাবে তেওঁ চিধাই তললৈ সৰি পৰিল। লগে লগে তেওঁক চৰকাৰী চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে।
খান্নাৰ আমলোহ ৰোডৰ প্ৰীত নগৰত পৰিয়ালৰ সৈতে ভাড়াঘৰত বাস কৰিছিল বিহাৰৰ ৪৬ বছৰীয়া লখৱিন্দৰ ৰাম। বুধবাৰে লখৱিন্দৰ ৰামৰ পত্নীয়েও কৰৱা চৌথৰ ব্ৰত পালন কৰে। পত্নীৰ পৰামৰ্শ মতে ৰাতি চন্দ্ৰ উদয় হোৱাৰ সময় হোৱাত চন্দ্ৰ চাবলৈ ঘৰৰ চাদলৈ গ’ল স্বামী। সেয়াই বিপদ মাতি আনিলে লখৱিন্দৰ ৰামৰ জীৱনলৈ। পত্নীৰ বাবে জোন চাবলৈ গৈ চিৰদিনৰ বাবে জোনৰ দেশলৈ গুচি গ’ল স্বামী।
বিহাৰৰ বাসিন্দা লখৱিন্দৰ ৰামে কঠোৰ পৰিশ্ৰম কৰি পৰিয়াল পোহপাল দিছিল। পৰিয়ালটোৰ উপাৰ্জনৰ আন কোনো উপায় নাই। এতিয়া কান্দোনত ভাগি পৰিছে পৰিয়ালটো। মৰণোত্তৰ পৰীক্ষাৰ অন্তত মৃতদেহ পৰিয়ালৰ লোকক গতাই দিয়া হয়। এই ঘটনাই সমগ্ৰ অঞ্চলজুৰি গভীৰ শোকৰ ছাঁ পেলাইছে।
Continue Reading
