ডিজিটেল ডেস্কঃ মানুহৰ ৰং-ৰূপ সকলো ঈশ্বৰৰ দান। ইয়াত মানুহৰ কোনো হাত নাথাকে। কিন্তু কিছুমান মানুহে সেই কথা বুজি নাপায়। আনৰ ৰং-ৰূপ, শাৰীৰিক গঠনক লৈ ঠাট্টা-মস্কৰা কৰি আসুৰিক তৃপ্তি পায় এচাম লোকে। এগৰাকী মহিলাৰ দেহৰ ক'লা বৰণক লৈ আন মানুহে নহয় নিজৰ স্বামীয়েই কৰিছিল ঠাট্টা। যাৰ হ'ল অতি ভয়ংকৰ পৰিণতি।
ঠাট্টা-মস্কৰাৰ বলি হৈ হীনমন্যতাত ভুগিছিল মহিলাগৰাকীয়ে। তীব্ৰ খঙৰ বশৱৰ্তী হৈ অৱশেষত মহিলাগৰাকীয়ে স্বামীক কৰিলে হত্যা। এই ঘটনা সংঘটিত হৈছে ছত্তীশগড়ৰ দুৰ্গ জিলাত। এগৰাকী ৩০ বছৰীয়া মহিলাই ক’লা ৰংক লৈ স্বামীয়ে কৰা অহৰহ ঠাট্টা-মস্কৰাৰ দ্বাৰা ক্ষোভিত হৈ স্বামীক কুঠাৰেৰে হত্যা কৰাৰ অভিযোগ উত্থাপন হৈছে। অভিযুক্ত মহিলাগৰাকীয়ে স্বামীৰ গুপ্তাংগও কুঠাৰেৰে কাটি পেলায়। আৰক্ষীয়ে গ্ৰেপ্তাৰ কৰিছে অভিযুক্ত মহিলাগৰাকীক।
মঙলবাৰে এই সন্দৰ্ভত তথ্য প্ৰদান কৰি আৰক্ষীয়ে জনোৱা মতে, নিহত লোকজন আমলেশ্বৰ গাঁৱৰ বাসিন্দা অনন্ত সোণৱানী(৪০) বুলি চিনাক্ত কৰা হৈছে। আৰক্ষীয়ে জনোৱা মতে, দেওবাৰে নিশা স্বামী অনন্ত সোণৱানীক হত্যা কৰাৰ অভিযোগত সোমবাৰে আৰক্ষীয়ে গ্ৰেপ্তাৰ কৰে অভিযুক্ত মহিলা সংগীতা সোণৱানীক।
প্ৰাথমিক তদন্তত সংগীতা সোণৱানীয়ে আৰক্ষীক জনোৱা মতে তেওঁ দেখাত ভাল নহয় বুলি কৈছিল স্বামীয়ে। স্বামীয়ে তেওঁক অনাকৰ্ষণীয় বুলি কোৱাৰ লগতে প্ৰায়ে তেওঁৰ দেহৰ ক’লা ৰঙৰ বাবে ঠাট্টা কৰিছিল। সংগীতাই জনোৱা মতে, এই বিষয়টোক লৈ বিগত সময়ছোৱাত তেওঁলোকৰ মাজত কেইবাবাৰো কাজিয়া হৈছিল।
দেওবাৰে নিশাও অনন্ত আৰু সংগীতাৰ মাজত কাজিয়া হৈছিল আৰু ক্ষোভত সংগীতাই ঘৰত ৰখা কুঠাৰেৰে স্বামীক আক্ৰমণ কৰি হত্যা কৰে।
আৰক্ষীয়ে জনায় যে সংগীতাই পাছদিনা পুৱা কোনো লোকে তেওঁৰ স্বামীক হত্যা কৰা বুলি কৈ গাঁওবাসীক বিপথে পৰিচালিত কৰিবলৈ চেষ্টা কৰিছিল যদিও পাছত আৰক্ষীৰ জেৰা কৰাত তেওঁ নিজে হত্যাকাণ্ড সংঘটিত কৰা বুলি স্বীকাৰ কৰে। উল্লেখ্য যে অনন্ত সোণৱানীয়ে প্ৰথম পত্নীৰ মৃত্যুৰ পাছত অভিযুক্ত সংগীতাক দ্বিতীয় বিবাহ কৰাইছিল।
মহিলাগৰাকীৰ বিৰুদ্ধে আই পি চি ধাৰা ৩০২ (হত্যা) আৰু অন্যান্য প্ৰাসংগিক বিধানৰ অধীনত গোচৰ ৰুজু কৰা হৈছে আৰু পৰৱৰ্তী তদন্ত চলি আছে।
Continue Reading
