ডিজিটেল ডেস্ক: জোৰাম পিপ’লছ মুভমেণ্টৰ নেতা লালডুহোমাই আজি মিজোৰামৰ নতুন মুখ্যমন্ত্ৰী হিচাপে শপতগ্ৰহণ কৰে। আইজলৰ ৰাজভৱন চৌহদত আয়োজিত শপতগ্ৰহণ অনুষ্ঠানত আন কেইবাজনো জেডপিএম নেতাই মন্ত্ৰী হিচাপে শপতগ্ৰহণ কৰে৷
মঙলবাৰে জেডপিএম বিধায়িনী দলে লালডুহোমাক বিধায়িনী দলৰ নেতা আৰু কে চাপদংগাক উপনেতা হিচাপে নিৰ্বাচিত কৰে।
জেডপিএম মিডিয়া চেলৰ সাধাৰণ সম্পাদক এডি জোচাংলিয়ানাই কৈছিল যে দলটোৰ পৰামৰ্শদাতা সংস্থা Val Upa Councilএ বুধবাৰে মন্ত্ৰী পৰিষদ গঠনৰ সিদ্ধান্ত ল’বলৈ লালডুহোমাক সাক্ষাৎ কৰে।
লালৰিনপুই হৈছে ১২জনীয়া মন্ত্ৰী পৰিষদৰ একমাত্ৰ মহিলা মন্ত্ৰী। ১২গৰাকী মন্ত্ৰীৰ ভিতৰত ৭গৰাকী প্ৰথমবাৰৰ বাবে বিজয়ী।
শুকুৰবাৰে শপত গ্ৰহণ কৰা আন মন্ত্ৰীসকলৰ ভিতৰত আছে, কে. চাপডাংগা, ভানলালহলানা, চি. লালচাৱিভুংগা, লালথানচাংগা, ড° ভানলালথলানা, পি.চি. ভানলালৰুয়াটা, লালৰিনপুই, ৰোডিংলিয়ানা, বি. লালছানজোভা, অধ্যাপক লালনিলাৱমা আৰু লালংমাৰা৷
কেৱল ২০১৯ত ৰাজনৈতিক দল হিচাপে পঞ্জীয়ন কৰা জেডপিএমে বিধানসভা নিৰ্বাচনত ২৭খন আসন লাভ কৰি বিজয়ী হৈছিল, যাৰ ফলত ২০১৮ৰ নিৰ্বাচনত দলটোৰ সংখ্যা ৮ৰ পৰা বৃদ্ধি পাইছিল।
বিদায়ী মুখ্যমন্ত্ৰী জোৰামথাংগাৰ নেতৃত্বত মিজো নেচনেল ফ্ৰণ্ট (এমএনএফ)ক সিংহাসনচ্যুত কৰে জেডপিএম-এ৷ ২০১৮ৰ নিৰ্বাচনত ২৬খন আসন লাভ কৰা এমএনএফ-এ এইবাৰ মাত্ৰ ১০খন আসনতহে জয়লাভ কৰিবলৈ সক্ষম হৈছিল।
Continue Reading
