ডিজিটেল ডেস্কঃ পোহনীয়া কুকুৰটো কাষত বহুৱাই যুৱকজনে গাড়ী চলাই আছিল। নিচাগ্ৰস্ত অৱস্থাত থকা যুৱকজনে অতিমাত্ৰা গতিৰে গাড়ী চলাব ধৰিলে। সেয়ে কৰ্তব্যৰত আৰক্ষীয়ে দূৰৰ পৰা গাড়ীখন ৰখাবলৈ ইংগিত দিলে। গ্ৰেপ্তাৰৰ আশংকাত তেওঁ আৰক্ষী বিষয়াজনৰ ইংগিত অমান্য কৰি তীব্ৰগতিত গুছি যায়। কিন্তু তথাপিও পুলিচে তেওঁৰ পিচা ল’ব ধৰিলে। পৰিস্থিতি বিষম দেখি কাষত থকা পোহনীয়া কুকুৰটোকে গাড়ীৰ চালকৰ আসনত বহুৱাই দিলে যুৱকজনে। অৰ্থাৎ বুজাব বিচাৰিলে যে তীব্ৰ গতিত গাড়ীখন কুকুৰটোৱেহে চলাইছিল।
আমেৰিকা যুক্তৰাষ্ট্ৰৰ ক’লৰাডোৰ স্প্ৰিংফিল্ড নামৰ এখন সৰু চহৰত সংঘটিত হৈছে এই ঘটনা। সংবাদ মাধ্যমৰ খবৰ অনুসৰি আৰক্ষীয়ে যুৱকজনক গ্ৰেপ্তাৰ কৰিছে। শনিবাৰে নিশা যুৱকজনে সংঘটিত কৰিছিল এই কাণ্ড। গাড়ীখন যেতিয়া আটক কৰিবলৈ সক্ষম হয়, তেতিয়া আৰক্ষীয়ে গাড়ীৰ ষ্টিয়াৰিংডাল এটা কুকুৰে ধৰি থকা দেখিলে। পিছত অৱশ্যে আৰক্ষীৰ জেৰাৰ সময়ত যুৱকজনে নিজৰ অপৰাধ স্বীকাৰ কৰে। শাৰীৰিক পৰীক্ষাৰ অন্তত চিকিৎসকে যুৱকজনৰ শৰীৰত নিচাজাতীয় পদাৰ্থ উদ্ধাৰ কৰিছে।
Continue Reading
