ডিজিটেল ডেস্ক
অসমৰ চৰকাৰৰ তৃতীয় আৰু চতুৰ্থ বৰ্গৰ পৰীক্ষাৰ সুকলমে অনুষ্ঠিত কৰিবলৈ যোৱা ২১ আগষ্টত কৰ্তন কৰা হৈছিল ২৪ খন জিলাৰ ইন্টাৰনেট সেৱা৷ দীৰ্ঘ সময়ৰ বাবে ইন্টাৰনেট কৰ্তন কৰাৰ ফলত বহু দুৰ্দশাৰ সন্মুখীন হৈছিল অসমবাসী৷
পুনৰ ২৮ আগষ্টত অনুষ্ঠিত হ’ব তৃতীয় বৰ্গৰ পৰীক্ষা৷ আৰু দ্বিতীয়বাৰৰ বাবে কৰ্তন কৰা হ’ব ইন্টাৰনেট সেৱা৷ এইবাৰ ইন্টাৰনেট বন্ধ হ’বলগীয়া জিলাৰ সংখ্যা পূৰ্বতকৈ বেছি৷ চৰকাৰৰ ইন্টাৰনেট কৰ্তনৰ এই সিদ্ধান্তৰ বিৰোধিতা কৰি গুৱাহাটী উচ্চ ন্যায়ালয়ত লেখ আবেদন দাখিল কৰিছিল ৰাজু প্ৰসাদ শৰ্মাই৷ দুদিন ধৰি এই সন্দৰ্ভত গুচৰীয়া আৰু চৰকাৰী পক্ষৰ যুক্তি শুনি উচ্চ ন্যায়ালয়ৰ সুমন শ্যামৰ এজনীয়া বিচাৰপীঠে গুচৰীয়াক অন্তৱৰ্তীকালীন সকাহ দিবলৈ অস্বীকাৰ কৰে৷
অসম চৰকাৰৰ সিদ্ধান্ত মতেই পুনৰ ২৬ আগষ্টতো বন্ধ থাকিব ইন্টাৰনেট৷ যিসময়ত ইন্টাৰনেট সেৱা লাভ কৰাটো নাগৰিকৰ মৌলিক অধিকাৰ , সেইসময়ত এটা সাধাৰণ পৰীক্ষাৰ বাবেই ইন্টাৰনেট কৰ্তন কৰি নাগৰিকক নগুৰ- নাগতি কৰিছে চৰকাৰে৷ পুনৰ ইন্টাৰনেট কৰ্তনৰ বাবে ক্ষতিগ্ৰস্ত হ’ব ৰাজ্যৰ অনলাইন ব্যৱসায়ী সকলো।
ৰাজ্যৰ নাগৰিকৰ কথা চিন্তা নকৰাকৈয়ে একপক্ষীয় সিদ্ধান্তৰে পূৰ্বতেও ইন্টাৰনেট কৰ্তন কৰিছে অসম চৰকাৰে৷ পৰীক্ষা সুকলমে অনুষ্ঠিত কৰিবলৈ ইন্টাৰনেট কৰ্তনৰ বিপৰীতে বিকল্প ব্যৱস্থা গ্ৰহণ কৰিব লাগিছিল চৰকাৰে৷ ৰাজ্যৰ বিভিন্ন প্ৰান্তৰ ৰাইজো ক্ষুব্ধ হৈ পৰিছে চৰকাৰৰ সিদ্ধান্তত৷
চৰকাৰৰ দক্ষতাক লৈয়ো বৰ্তমান প্ৰশ্নৰ উত্থাপন হৈছে৷ এটা তৃতীয় বৰ্গৰ পৰীক্ষাতেই ইন্টাৰনেট কৰ্তন কৰা চৰকাৰে কেনেকৈ উচ্চ স্তৰৰ পৰীক্ষা চম্ভালিব তাক লৈয়ো সন্দেহ প্ৰকাশ কৰিছে নাগৰিক সকলে৷
Continue Reading
