পুনৰ বন্যজন্তু নিৰ্যাতনৰ অভিযোগ উঠিল সদগুৰুৰ বিৰুদ্ধে, কৰ্ণাটক বন বিভাগৰ দ্বাৰস্থ বন্যপ্ৰাণী সুৰক্ষা সংস্থা

ডিজিটেল ডেস্কঃ কাজিৰঙাত নৈশ চাফাৰী কৰি বিতৰ্কত সাঙুৰ খাই পৰা জাগী বাসুদেৱ তথা সদগুৰুৰ বিৰুদ্ধে পুনৰ বন্যজন্তু নিৰ্যাতনৰ অভিযোগ উঠিছে। এটা বন্যজন্তু অধিকাৰ গ্ৰুপে সদগুৰুৰ বিৰুদ্ধে শেহতীয়াকৈ কৰ্ণাটকৰ বন্ বিভাগৰ ওচৰত এখনি অভিযোগ পত্ৰ দাখিল কৰিছে।

বিভাগীয় সূত্ৰই জনোৱা মতে, কৰ্ণাটকৰ চিক্কাবাল্লাপুৰত ৯ অক্টোবৰ তাৰিখে এটা অনুষ্ঠানত সদগুৰুৱে এডাল নিগনি ধৰা সাপ প্ৰদৰ্শন কৰিছিল। দ্যা চ’চাইটি ফৰ প্ৰিভেন্সন অৱ ক্ৰুৱেলিটি টু এনিমেলছ নামৰ উক্ত বন্যজন্তু অধিকাৰ গ্ৰুপটোৰ হৈ পৃথিৱী ৰাজ চি এনে অভিযোগ কৰে যে সদগুৰুৱে বন্যজন্তু সুৰক্ষা আইন উলংঘা কৰিছে।

তেওঁ লগতে কয় যে সদগুৰুৱে যিডাল সাপ প্ৰদৰ্শন কৰিছিল, সেই সাপডাল বন্যজন্তু অধিকাৰ আইনৰ ২ নং ধাৰা অনুসৰি সংৰক্ষিত। কিন্তু সদগুৰুৱে সাপডাল অত্যধিক পোহৰত দৰ্শকৰ আগত প্ৰদৰ্শন কৰি এই আইন উলংঘা কৰিছে।

বন্যজন্তু অধিকাৰ গ্ৰুপটোৱে অভিযোগ দাখিল কৰাৰ পাছতে সমগ্ৰ ঘটনাৱলীক লৈ বৰ্তমান তদন্ত চলি আছে। আনহাতে, সদগুৰুৰ সংস্থা ইছা ফাউণ্ডেচনে সমগ্ৰ অভিযোগসমূহ টুইটাৰযোগে নস্যাৎ কৰিছে।