ডিজিটেল ডেস্কঃ বন্দে ভাৰত এক্সপ্ৰেছ পুনৰ 'লাইনচ্যুত' হৈ পৰিল। এইবাৰ ৰে’ল খনে এটা গৰুক খুন্দিয়ায়। ফলত গৰুটোৰ মৃত্যু ঘটে। বৃহস্পতিবাৰে নিশা বন্দে ভাৰত এক্সপ্ৰেছ পুনৰ দুৰ্ঘটনাত পতিত হৈছিল। প্ৰধানমন্ত্ৰী নৰেন্দ্ৰ মোদীৰ গৃহ ৰাজ্য গুজৰাটত বৃহস্পতিবাৰে নিশা মুম্বাইৰ পৰা গান্ধীনগৰলৈ যাত্ৰা কৰা চুপাৰফাষ্ট এক্সপ্ৰেছ ৰে'লখনে উদভাদা আৰু ৱাপী ষ্টেচনৰ মাজত গৰুটোক খুন্দা মাৰে।
পশ্চিম ৰে’লৱেৰ বিষয়া সুনীল ঠাকুৰে কয় যে ঘটনাটোৰ ফলত ৰেলখনৰ সন্মুখৰ পেনেলত এটা সৰু ফাঁট মেলিছে।উল্লেখ্য ৩০ ছেপ্টেম্বৰত প্ৰধানমন্ত্ৰী মোদীয়ে ৰেলখন উদ্বোধন কৰিছিল। তাৰ পিছত বন্দে ভাৰত এক্সপ্ৰেছে চাৰিটা দুৰ্ঘটনাত পতিত হৈছে।
ৰে’ল খনে কেইবাবাৰো গৰু আৰু ম'হক খুন্দা মাৰিছে।৮ নৱেম্বৰত গান্ধীনগৰ ষ্টেচনৰ পৰা প্ৰায় ১০০ কিলোমিটাৰ দূৰত থকা আনন্দ ষ্টেচনৰ ওচৰত বন্দে ভাৰত এক্সপ্ৰেছৰ খুন্দাত এগৰাকী মহিলাৰ মৃত্যু হৈছিল। বন্দে ভাৰত এক্সপ্ৰেছখনে প্ৰতি ঘণ্টাত ১৬০ কিলোমিটাৰ বেগত চলিব পাৰে।
পশ্চিম ৰে’লৱেৰ সূত্ৰই প্ৰকাশ কৰা অনুসৰি ৰে’লখন আন ৰে’লতকৈ অধিক আৰামদায়ক। কিন্তু জনবসতিপূৰ্ণ অঞ্চলত এই উচ্চ গতিৰ ৰে’লখন চলোৱাটো বিপদজনক হয় নে নহয় তাকে লৈ ইতিমধ্যে প্ৰশ্ন উত্থাপিত হৈছে।
Continue Reading
