ডিজিটেল ডেস্কঃ ৰাজস্থানৰ হনুমানগড় জিলাত সংঘটিত হৈছে ভাৰতীয় বায়ুসেনাৰ এটা ভয়াৱহ দুৰ্ঘটনা। সোমবাৰে পুৱা বায়ুসেনাৰ এখন মিগ ২১ যুদ্ধ বিমান দুৰ্ঘটনাগ্ৰস্ত হয়। এই দুৰ্ঘটনাৰ ফলত স্থানীয় তিনিজন বাসিন্দাৰ মৃত্যু হয়। নিহত তিনিজনৰ ভিতৰত কমেও দুগৰাকী মহিলা বুলি জানিব পৰা গৈছে। অৱশ্যে বিমানখনৰ পাইলট সুৰক্ষিত আছে।
উল্লেখ্য যে ধাৰাবাহিকভাৱে বায়ুসেনাৰ দুৰ্ঘটনা সংঘটিত হৈ আহিছে। কিছুদিন পূৰ্বে জম্মু-কাশ্মীৰত ভাৰতীয় সেনাৰ ধ্ৰুৱ হেলিকপ্টাৰ দুৰ্ঘটনাগ্ৰস্ত হৈছিল। তাত এজন টেকনিচিয়ানৰ মৃত্যু ঘটে। বিগত বৰ্ষতো জুলাইৰ আৰম্ভণিতে ৰাজস্থানৰ বৰমেধত ভাৰতীয় বায়ুসেনাৰ মিগ যুদ্ধ বিমান দুৰ্ঘটনাগ্ৰস্ত হৈছিল। এই ঘটনাত দুজন পাইলটৰ মৃত্যু হয়।
বায়ুসেনাৰ যথেষ্ট আস্থা থকা এই যোদ্ধা বিমানখনৰ নিৰাপত্তাৰ ওপৰত বাৰে বাৰে প্ৰশ্ন উত্থাপন হৈছে। ইয়াৰ বাবেই ভাৰত চৰকাৰে ক্ৰমান্বয়ে এই বিমানসমূহৰ ব্যৱহাৰ হ্ৰাস কৰাৰ চেষ্টা কৰিছে।
তথ্য অনুসৰি ১৯৬৬ চনৰ পৰা ১৯৮০ চনৰ ভিতৰত ভাৰতে মুঠ ৮৭২ খন মিগ যুদ্ধ বিমান ক্ৰয় কৰিছিল। ১৯৭১ চনৰ পৰা ২০১২ চনৰ ভিতৰত ৪৮২খন বিমান দুৰ্ঘটনাগ্ৰস্ত হয়। এই দুৰ্ঘটনাত ১৭১ জন পাইলট, ৩৯ জন অসামৰিক লোক, ৮ জন চাৰ্ভিচ কৰ্মী, এজন এয়াৰ ক্ৰুৱে প্ৰাণ হেৰুৱায়।
২০১৩ চনৰ পৰা ভাৰতত এই মিগ আৰু ছুখয় যুদ্ধ বিমানৰ কমেও ১১টা দুৰ্ঘটনা সংঘটিত হৈছে। আজিৰ দুৰ্ঘটনাটোও এই তালিকাত যোগ হ’ল।
Continue Reading
