পুনৰ উত্তপ্ত বাংলাদেশঃ প্ৰধানমন্ত্ৰী হাছিনাৰ পদত্যাগৰ দাবীত উত্তাল ঢাকা

বি এন পিৰ বৃহৎ সমদল সন্দৰ্ভত চৰকাৰৰ বক্তব্য বাংলাদেশী সংবাদ মাধ্যমত প্ৰকাশ পাইছে। চৰকাৰে কৈছে যে বাংলাদেশে দেশৰ নিৰ্বাচন সম্পৰ্কীয় কোনো 'আভ্যন্তৰীণ ষড়যন্ত্ৰ' সহ্য নকৰে। এই ক্ষেত্ৰত "বিদেশীৰ হস্তক্ষেপ" সহ্য কৰা নহ'ব। শ্বেখ হাছিনাৰ চৰকাৰ বাংলাদেশত মুক্ত আৰু নিৰপেক্ষ নিৰ্বাচন অনুষ্ঠিত কৰিবলৈ প্ৰতিশ্ৰুতিবদ্ধ বুলিও পুনৰবাৰ দোহাৰে।বাংলাদেশৰ আইন মন্ত্ৰী আনিছুল হক, বৈদেশিক মন্ত্ৰী এ কে আব্দুল মোমেন আৰু ৰাজ্যিক বৈদেশিক পৰিক্ৰমা মন্ত্ৰী মোঃ চহৰিয়াৰ আলমেও চৰকাৰৰ স্থিতিকেই দোহাৰিছে। তেওঁলোকে বি এন পিৰ বৈঠক সন্দৰ্ভত চৰকাৰৰ স্থিতিৰ বিষয়ে সংবাদ মাধ্যমক অৱগত কৰে। উল্লেখ্য অহা বছৰ বাংলাদেশত নিৰ্বাচন অনুষ্ঠিত হোৱাৰ কথা। চৰকাৰে কৈছে যে বাংলাদেশে এই ক্ষেত্ৰত "কোনো বাহ্যিক চাপ"ৰ সন্মুখীন নহ'ব।

উল্লেখ্য বাংলাদেশত বি এন পিয়ে  সমদলৰ উলিওৱাৰ  আগতে কেইবাজনো গুৰুত্বপূৰ্ণ নেতাক আৰক্ষীয়ে আটক কৰে৷  বি এন পিৰ মুখ্য কাৰ্যালয়ৰ বাহিৰত আৰক্ষী আৰু কৰ্মীসকলৰ মাজত সংঘৰ্ষ লগাও পৰিলক্ষিত হয়। সমদলটোৰ আগতে আৰক্ষীয়ে এজন লোকক গুলীয়াই হত্যা কৰিছিল৷

বি এন পিয়ে সাধাৰণ নিৰ্বাচনৰ পূৰ্বে প্ৰধানমন্ত্ৰীৰ পদত্যাগ দাবী কৰি আহিছে। একে সময়তে, বি এন পি নেতৃত্বই বিচাৰে যে নিৰ্বাচন এখন নিৰপেক্ষ চৰকাৰৰ অধীনত অনুষ্ঠিত হওঁক। ক্ষমতাসীন আৱামী লীগে কৈছে যে দলটোৱে  নিৰপেক্ষ চৰকাৰৰ অধীনত নিৰ্বাচন অনুষ্ঠিত  কৰিবলৈ ইচ্ছুক নহয়। কাৰণ এয়া  বাংলাদেশৰ সংবিধানৰ বিৰোধী।