পুনেত পিএফআইৰ প্ৰতিবাদৰ সময়ত 'আল্লা-হু-আকবৰ, পাকিস্তান জিন্দাবাদ' ধ্বনি!

পুনে চহৰৰ জিলা উপায়ুক্তৰ কাৰ্যালয়ৰ বাহিৰত  পিএফআই সমৰ্থকসকলে ইডি-চিবিআই-আৰক্ষীৰ অভিযানৰ বিৰুদ্ধে প্ৰতিবাদ কৰি থকাৰ সময়তে কোনোৱাই 'পাকিস্তান জিন্দাবাদ' শ্ল'গান দিয়ে । আৰক্ষীয়ে ইয়াৰ পিছতে কেইবাজনো লোকক গ্ৰেপ্তাৰ কৰে। পুনে মহানগৰ আৰক্ষীয়ে কৈছে যে আৰক্ষীয়ে  বিষয়টো চোৱা-চিতা কৰি আছে। 

প্ৰতিবাদৰ সময়ত, আৰক্ষীয়ে প্ৰায় ৪০ জন প্ৰতিবাদকাৰীক আটক কৰে। প্ৰতিবাদকাৰীসকলক জিম্মাত লৈ আৰক্ষীৰ বাহনত উঠাবলৈ লোৱাৰ সময়তে  "পাকিস্তান জিন্দাবাদ" শ্ল'গান দিয়া শুনিবলৈ পোৱা যায়। 'পাকিস্তান জিন্দাবাদ' শ্ল'গান দিয়াৰ  ভিডিঅ' ছচিয়েল মিডিয়াত ভাইৰেল হৈ পৰিছে।  আৰক্ষী উপ-আয়ুক্ত সাগৰ পাটিলে কয়, "আমি ইতিমধ্যে পিএফআই সদস্যসকলৰ বিৰুদ্ধে বেআইনী সমাবেশৰ  এটা গোচৰ ৰুজু কৰিছো আৰু  শ্ল'গানৰ বিষয়টো চোৱা-চিতা কৰি আছো।"উল্লেখ্য সন্ত্ৰাসবাদী কাৰ্যকলাপৰ সৈতে জৰিত থকাৰ অভিযোগত  কেন্দ্ৰীয় তদন্তকাৰী সংস্থা নিয়াই স্থানীয় আৰক্ষীক লগত লৈ দেশৰ ১৩ খন ৰাজ্যত পিএফআই-এছডিপিআইৰ বিৰুদ্ধে অভিযান চলাইছিল। গুৱাহাটীকে ধৰি দেশৰ বিভিন্ন স্থানৰ পৰা ১০৫ জন লোকক গ্ৰেপ্তাৰ কৰা হৈছিল।

 এই  অভিযান  পুৱতি নিশা ৩.৩০ বজাত আৰম্ভ হৈছিল। বিশ্বাসযোগ্য প্ৰমাণ আৰু চোৰাংচোৱাৰ তথ্যৰ আধাৰত ৰাষ্ট্ৰীয় অনুসন্ধান সংস্থা (এনআইএ) প্ৰৱৰ্তন সঞ্চালকালয় আৰু ৰাজ্যিক আৰক্ষীক লগতলৈ  সন্ত্ৰাসবাদীক পুঁজিৰ সৰবৰাহ আদিৰ অভিযোগত   পিএফআই, এছডিপিআইৰ বিৰুদ্ধে ১৩  খন ৰাজ্যক সামৰি অভিযান চলায়। 

কেৰালা, তামিলনাডু, কৰ্ণাটক, তেলেংগানা, অন্ধ্ৰ প্ৰদেশ, মহাৰাষ্ট্ৰ, মধ্য প্ৰদেশ, উত্তৰ প্ৰদেশ, পুডুচেৰী, অসম, ৰাজস্থানত এই অভিযান চলোৱা হৈছিল।