ডিজিটেল ডেস্ক: পৰৱৰ্তী লোকসভা নিৰ্বাচনত সৰ্বস্ব ত্যাগ কৰিবলৈ সাজু থাকিব লাগিব অসম গণ পৰিষদ৷ আঞ্চলিকতাবাদী চৰিত্ৰক বিসৰ্জন দি বিজেপিৰ মিত্ৰতাত আবদ্ধ হোৱা অসমৰ আঞ্চলিক ৰাজনৈতিক দলটোক সাংগঠনিকভাৱে সংকুচিত কৰি আনিছে ভাৰতীয় জনতা পাৰ্টীয়ে৷ আৰু তাৰেই অংশস্বৰূপে পৰৱৰ্তী লোকসভা নিৰ্বাচনত বিজেপিৰ বাবে সৰ্বস্ব ত্যাগ কৰিবলৈ সাজু থাকিব শ্বহীদৰ তেজসিক্ত অসম গণ পৰিষদ৷
২০২৪ৰ লোকসভা নিৰ্বাচনৰ বাবে বিজেপিয়ে গুৰুত্ব প্ৰদান কৰিছে কংগ্ৰেছৰ দখলত থকা বৰপেটা আৰু কলিয়াবৰ সমষ্টিত৷ কংগ্ৰেছৰ দখলত থকা এই দুটা সমষ্টিত প্ৰতিদ্বন্দ্বিতাৰ বাবে মিত্ৰদলক বঞ্চিত কৰি বিজেপিয়ে নিজেই প্ৰাৰ্থিত্ব প্ৰদান কৰাৰ সম্ভাৱনা স্পষ্ট হৈ পৰিছে৷ বিজেপিৰ সমীকৰণ অনুসৰি, আন ১২টা সমষ্টিত বিজেপিৰ বিজয় নিচান উৰুৱাবলৈ তৎপৰ হৈ পৰা বিজেপিৰ বাবে সন্মানৰ প্ৰশ্ন হৈ পৰিছে বৰপেটা আৰু কলিয়াবৰ লোকসভা সমষ্টি৷ বিজেপিৰ পৰিকল্পনাৰ অংশ মতেই এই দুটা সমষ্টিত বিজেপিয়েহে প্ৰাৰ্থিত্ব আগবঢ়াব৷
ইতিমধ্যে, বিজেপিৰ কেন্দ্ৰীয় নেতৃত্বই সৰ্বানন্দ সোণোৱালক কলিয়াবৰ আৰু ভুবনেশ্বৰ কলিতাক বৰপেটাৰ পৰ্সবেক্ষক হিচাপে নিযুক্ত কৰা হৈছে৷ ৰাজ্যিক বিজেপিৰ তৎপৰতাৰ মাজতেই কালি কলিয়াবৰত উপস্থিত হয় কেন্দ্ৰীয় মন্ত্ৰী কিৰেন ৰিজিজু৷
কলিয়াবৰ লোকসভা সমষ্টিৰ লোকসভা প্ৰভাস যোজনা আঁচনিৰ ‘হিতাধিকাৰী সন্মিলন’ত অংশ ল’বলৈ আহি কেন্দ্ৰীয় মন্ত্ৰীগৰাকীয়ে বৰপেটা, কলিয়াবৰ আৰু নগাঁৱত বিজেপি প্ৰাৰ্থীয়ে জয়লাভ কৰিব বুলি ইংগিতধৰ্মী মন্তব্য কৰে৷ তেওঁ কয়, অসমৰ সকলোতে এতিয়া তৃণমূল পৰ্যায়ত বিজেপিৰ শক্তিশালী ভেঁটি আছে৷ কিন্তু বিজেপিৰ ভেঁটি থাকিলেও আমি সন্তুষ্ট নহওঁ৷ সেয়ে সমাগত লোকসভা নিৰ্বাচনত কলিয়াবৰ, বৰপেটা আৰু নগাঁৱত বিজেপিৰ প্ৰাৰ্থী জিকিব লাগিব৷ নৰেন্দ্ৰ মোদী আকৌ প্ৰধানমন্ত্ৰী হোৱাৰ স্বাৰ্থতেই এই তিনিটা সময়ত বিজেপি প্ৰাৰ্থী জিকিব লাগিব৷
এইদৰেই মন্তব্য কৰি কেন্দ্ৰীয় মন্ত্ৰীগৰাকীয়ে সমষ্টিকেইটা অগপক এৰি নিদিয়াৰ স্পষ্ট ইংগিত দিয়ে৷ উল্লেখযোগ্য যে, বিগত লোকসভা নিৰ্বাচনত বৰপেটা আৰু কলিয়াবৰ অগপক এৰি দিছিল বিজেপিয়ে৷ বৰপেটাত কুমাৰ দীপক দাস আৰু কলিয়াবৰত মণিমাধৱ মহন্তক দিয়া হৈছিল প্ৰাৰ্থিত্ব৷ কংগ্ৰেছৰ হাতত পৰাজিত হৈছিল দুয়োগৰাকী নেতাই৷
পূৰ্বৰ ২০১৪ৰ লোকসভা নিৰ্বাচনতো সমষ্টি দুটাত অগপ প্ৰাৰ্থী জয়ী হোৱা নাছিল৷ এনে প্ৰেক্ষাপটতে ২০১৪ৰ লোকসভা নিৰ্বাচনত বিজেপিয়ে নিজৰ দলৰ প্ৰাৰ্থিত্ব প্ৰদান কৰি সমষ্টিকেইটাত নিজৰ আধিপত্য বিস্তাৰৰ লক্ষ্য নিৰ্ধাৰণ কৰিছে৷
Continue Reading
