পুৰণি গোচৰৰ আঁত বিচাৰি অশোক গেহলটৰ ভাতৃৰ বাসভৱনত চিবিআই

ডিজিটেল ডেস্ক: আজি পুৱাতে চিবিআইয়ে ৰাজস্থানৰ মুখ্যমন্ত্ৰী, জ্যেষ্ঠ কংগ্ৰেছ নেতা অশোক গেহলটৰ ভাতৃ অগ্ৰসেন গেহলটৰ যোধপুৰৰ বাসভৱনত তালাচী চলায়৷ অগ্ৰসেন গেহলট এগৰাকী সাৰ ব্যৱসায়ী আৰু পূৰ্বে প্ৰৱৰ্তন সঞ্চালকালয়ে সাৰ কেলেংকাৰীৰ অভিযোগত তেওঁক সোধা-পোছা কৰিছিল।

ৰাহুল গান্ধীক ইডিয়ে জেৰা কৰি থকাৰ সময়তে কংগ্ৰেছে দেশজুৰি প্ৰতিবাদ কৰি অহাৰ সময়তে চিবিআইৰ এই অভিযানে বিশেষ তাৎপৰ্য বহন কৰিছে৷ ইউপিএ চৰকাৰ শাসনত থাকোতে ২০০৭ ৰ পৰা ২০০৯ চনৰ ভিতৰত ৰাজসাহায্যযুক্ত সাৰ ৰপ্তানি কৰাৰ অভিযোগ উত্থাপিত হৈছিল৷

সূত্ৰ অনুসৰি, ২০০৭ চনৰ পৰা ২০০৯ চনলৈ অগ্ৰসেন গেহলটে বিদেশলৈ বৃহৎ পৰিমাণৰ মুৰিয়াট পটাছ (এমঅ’পি) ৰপ্তানি কৰিছিল যিটো ভাৰতীয় কৃষকসকলৰ বাবে ৰাজসাহায্যযুক্ত হাৰত আছিল।

এমঅ’পি দেশৰ দৰিদ্ৰ কৃষকসকলৰ বাবে আছিল। অগ্ৰসেন গেহলটে তেওঁৰ প্ৰতিষ্ঠান ‘অনুপম কৃষি’ৰ জৰিয়তে ৰাজসাহায্যযুক্ত হাৰত এমঅ’পি ক্ৰয় কৰে আৰু পাছত উচ্চ হাৰত মালয়েছিয়া আৰু ভিয়েটনামৰ দৰে দেশক বিক্ৰী কৰে৷ ২০২০ চনত ইডিয়ে তালাচী চলাই এই তথ্য সদৰী কৰিছিল৷

২০০৭ চনৰ সাৰ কেলেংকাৰী:

২০০৭ৰ সাৰ কেলেংকাৰীৰ অৰ্থ হৈছে পটাছৰ মুৰিয়াটৰ অবৈধ ৰপ্তানি, যাক ইণ্ডিয়ান পটাছ লিমিটেডে (আইপিএল) আমদানি কৰে আৰু ভাৰতীয় কৃষকসকলক বিতৰণ কৰে।

অভিযোগ কৰা হৈছে যে গেহলটে ২০০৭-২০০৯ চনত বিদেশলৈ ৩৫,০০০ টন এমঅ’পি ৰপ্তানি কৰিছিল, যিটো প্ৰকৃততে ভাৰতীয় কৃষকসকলৰ বাবে ৰাজসাহায্যপ্ৰাপ্ত হাৰত আছিল। ইডিয়ে এইটোও কৈছিল যে ঔদ্যোগিক নিমখৰ ছদ্মবেশত মালয়েছিয়া আৰু ছিংগাপুৰলৈ এমঅ’পিক ৰপ্তানি কৰা হৈছিল।

প্ৰতিবেদন অনুসৰি, কেলেংকাৰীটোৰ ১৫০কোটি টকাক বুলি কোৱা হৈছে। ইতিমধ্যে গেহলট আৰু তেওঁৰ কোম্পানীক পূৰ্বে এইক্ষেত্ৰত প্ৰায় ৭ কোটি টকাৰ শুল্ক জৰিমনা বিহা হৈছিল।