পুত্ৰৰ বাবে স্থান নিগাজি কৰিবলৈ আৰু তেওঁৰ জোঁৱায়েকক উপহাৰ দিবলৈয়েই অনাস্থা প্ৰস্তাৱ! লোকসভাৰ মজিয়াত তিনি শতাধিক বিজেপি সাংসদৰ ঠাট্টা-মস্কৰাৰ সন্মুখীন ছোনিয়া গান্ধী! আপৰ তীব্ৰ প্ৰতিক্ৰিয়া

মূল বিষয়ৰ পৰা আঁতৰি গৈ বিজেপিৰ সাংসদগৰাকীয়ে ছোনিয়া গান্ধীৰ বিৰুদ্ধে আপত্তিজনক মন্তব্য কৰে।  বিজেপিৰ সাংসদ  নিশিকান্ত ডুবেই  ছোনিয়া গান্ধী আৰু তেওঁৰ পুত্ৰ ৰাহুল গান্ধীৰ সৈতে চীনৰ সৈতে সম্পৰ্ক থকাৰ অভিযোগ উত্থাপন কৰি কয়  "মই ছোনিয়া গান্ধীক সন্মান কৰোঁ কিন্তু তেওঁৰ দুটা কাম আছে –  তেওঁৰ পুত্ৰৰ বাবে স্থান নিগাজি  কৰিবলৈ আৰু তেওঁৰ জোঁৱায়েকক  উপহাৰ দিবলৈয়েই  অনাস্থা প্ৰস্তাৱ অনা হৈছে।’’  

বিজেপি সাংসদ নিশিকান্ত ডুবেৰ কথাত  শাসকীয় দলৰ সাংসদসকলে হাঁহিত ফাটি পৰে। ইয়াৰ মাজতে  বিৰোধী সদস্যসকলে চৰকাৰ বিৰোধী শ্ল'গান দিবলৈ আৰম্ভ কৰে  আৰু লোকসভাৰ অধ্যক্ষক ডুবেৰ  মন্তব্য প্ৰত্যাহাৰ কৰিবলৈ আহ্বান জনায়। লোকসভাৰ কংগ্ৰেছ নেতা অধীৰ ৰঞ্জন চৌধুৰীয়ে অধ্যক্ষ ওম বিৰলাক সাক্ষাৎ কৰি বিজেপি সাংসদ নিশিকান্ত ডুবেৰ মন্তব্য সংসদৰ  ৰেকৰ্ডৰ পৰা আঁতৰ কৰিবলৈ দাবী জনায়।চৌধুৰীয়ে কংগ্ৰেছৰ সাংসদ শশী থাৰুৰ, গৌৰৱ গগৈ , মণিকাম ঠাকুৰ আৰু কে সুৰেশৰ সৈতে অধ্যক্ষক সাক্ষাৎ কৰি এই দাবী জনায়। লোকসভাত ভাষণ দি ডুবেই নিউয়ৰ্ক টাইমছত এটা বাতৰিৰ বিষয় উত্থাপন কৰিছিল। য'ত দাবী কৰা হৈছিল যে ৱেব পৰ্টেল নিউজক্লিকে ৩৮ কোটি টকাৰ পুঁজি লাভ কৰিছে আৰু এই ধন ভাৰত বিৰোধী পৰিৱেশ সৃষ্টিৰ বাবে ব্যৱহাৰ কৰা হৈছে। 

ডুবেই অভিযোগ কৰিছিল যে নিউজক্লিক ভাৰত বিৰোধী 'টুকডে টুকডে'ৰ সদস্য  আৰু সেই পূঁজি চীনৰ পৰা কংগ্ৰেছলৈ  গৈছে। তেওঁ কয়  "... ২০০৫ আৰু ২০১৪  চনৰ ভিতৰত চীনা চৰকাৰে কংগ্ৰেছক ধন পৰিশোধ কৰিছে... কংগ্ৰেছে ভাৰতক বিভাজন কৰিব বিচাৰে...।"  কংগ্ৰেছৰ লোকসভা হুইপ মণিকাম ঠাকুৰে বিজেপি সাংসদ নিশিকান্ত ডুবেৰ বিৰুদ্ধে অভিযোগ উত্থাপন কৰাৰ বাবে বিশেষাধিকাৰ জাননী দাখিল কৰে। ছোনিয়া গান্ধীক আক্ৰমণ কৰিবলৈ গৈ বিজেপি সাংসদ গৰাকীয়ে পুত্ৰ জোৱায়েকৰ কথা টানি অনাৰ বিষয়টোক আম আদমী পাৰ্টীয়ে তীব্ৰ প্ৰতিক্ৰিয়া ব্যক্ত কৰিছে। সংসদৰ তিনি শতাধিক বিজেপি সাংসদে এগৰাকী মহিলাকলৈ ঠাট্টা-মস্কৰা কৰাৰ বিষয়টো নিন্দনীয় বুলি আপৰ সাংসদ নৰেশ বালৱানে মন্তব্য কৰে।