ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদীৰ জীৱনলৈ বহু সময়ত ভাবুকি আহি থকাৰ সময়তে সোমবাৰে পুৱতি নিশা মোদীৰ বাসভৱনৰ ওপৰত এখন ৰহস্যময় ড্ৰোন উৰাৰ কথাই তীব্ৰ প্ৰতিক্ৰিয়ৰ সৃষ্টি কৰিছে। দিল্লী আৰক্ষীয়ে নতুন দিল্লীত প্ৰধানমন্ত্ৰী নৰেন্দ্ৰ মোদীৰ বাসগৃহৰ ওপৰত ড্ৰোন উৰাৰ খবৰ নিশ্চিত কৰিছে। ঘটনাটোৰ পৰিপ্ৰেক্ষিতত প্ৰধানমন্ত্ৰীৰ নিৰাপত্তা ব্যৱস্থা কঠোৰ কৰি তোলা হৈছে। দিল্লী আৰক্ষীৰ বিষয়াসকলে ইতিমধ্যে ঘটনাটোৰ তদন্ত আৰম্ভ কৰিছে।
আৰক্ষী সূত্ৰই জনোৱা অনুসৰি বিশেষ সুৰক্ষা গোটৰ (এছপিজি) সদস্যসকলে সোমবাৰে পুৱা প্ৰায় ৫ বজাত দিল্লী আৰক্ষীক ঘটনাটোৰ বিষয়ে অৱগত কৰে। প্ৰধানমন্ত্ৰীৰ নিৰাপত্তাৰ বাবে থকা এছপিজি বিষয়াসকলকো ঘটনাটো অৱগত কৰা হয়।এছপিজিৰ জোৱানেই প্ৰথমে ড্ৰোনখন লক্ষ্য কৰিছিল। দিল্লী আৰক্ষীয়ে খবৰ পোৱাৰ পিছতে দ্ৰুততাৰে তদন্তত নামি পৰে।
দিল্লী আৰক্ষীয়ে জনোৱা অনুসৰি, প্ৰধানমন্ত্ৰীৰ বাসগৃহ 'নো-ফ্লাই জোন'ৰ অন্তৰ্গত। অৰ্থাৎ নিৰাপত্তাজনিত কাৰণত কোনো বিমান বা ড্ৰোনে মোদীৰ বাসগৃহৰ ওপৰেৰে উৰিব নোৱাৰে। এনে পৰিস্থিতিত মোদীৰ বাসভৱনৰ ওপৰেৰে ড্ৰোনখন কেনেকৈ উৰিল তাকেলৈ ৰহস্যৰ সৃষ্টি হৈছে।ঘটনা সন্দৰ্ভত এয়াৰ ট্ৰেফিক কণ্ট্ৰোল (এটিচি)ৰ সৈতেও যোগাযোগ কৰা হৈছে। অৱশ্যে, তেনে কোনো ড্ৰোনৰ সন্ধান পোৱা হোৱা নাই।
দিল্লী আৰক্ষীয়ে এক বিবৃতিত কয়, "আমি তথ্য পাইছো যে প্ৰধানমন্ত্ৰীৰ বাসগৃহৰ ওচৰত এখন অচিনাক্ত উৰণীয়া বস্তু দেখা গৈছে। আমি ওচৰৰ এলেকাটো অনুসন্ধান কৰিছো আৰু তেনে কোনো বস্তু পোৱা নাই। এটিচিৰ সৈতেও যোগাযোগ কৰা হৈছে। তেওঁলোকেও তেনেকুৱা একো লক্ষ্য কৰা নাছিল বুলি কৈছে। "সেয়া ড্ৰোন আছিল নে আন কিবা সেই বিষয়ত নিশ্চিত হ’ব পৰা হোৱা নাই।
Continue Reading
