'পূৱ ভাৰতৰ লোকসকল দেখিবলৈ চীনা লোকৰ দৰে, দক্ষিণৰ লোক আফ্ৰিকাৰ দৰে...': কংগ্ৰেছ নেতা ছেম পিত্ৰোদাৰ মন্তব্যক তীব্ৰ সমালোচনা অসমৰ মুখ্যমন্ত্ৰী হিমন্ত বিশ্ব শৰ্মাৰ

পিত্ৰোদাই কৈছিল যে ভাৰতৰ জনসাধাৰণে "৭৫ বছৰ অতি সুখী পৰিৱেশত জীয়াই আছে , য'ত মানুহে একেলগে থাকিব পাৰে আৰু হাই-কাজিয়া এৰাই চলিব পাৰে"৷ পিত্ৰোদাই 'দ্য ষ্টেটছমেন'ক দিয়া এক সাক্ষাৎকাৰত ভাৰতীয় গণতন্ত্ৰৰ গৰিমা বৰ্ণনা কৰিবলৈ গৈ এনেদৰে কৈছিল৷  তেওঁ লগতে  কৈছিল যে ভাৰতীয়সকলে বিভিন্ন ভাষা, ধৰ্ম, খাদ্য আৰু ৰীতি-নীতিক সন্মান কৰে, যিবোৰ অঞ্চল অনুসৰি পৃথক হয়। তেওঁ কয়, "মই বিশ্বাস কৰা ভাৰতখনেই হৈছে, য'ত সকলোৰে বাবে স্থান আছে আৰু সকলোৱে অলপ আপোচ কৰি চলিব পাৰে।" ইয়াৰ আগতে, পিত্ৰোদাই আমেৰিকাত প্ৰচলিত উত্তৰাধিকাৰী কৰ ধাৰণাটোৰ বিষয়ে কৰা মন্তব্যই  বিতৰ্কৰ সৃষ্টি কৰিছিল ৷  

কংগ্ৰেছ নেতাগৰাকীৰ এনে মন্তব্যৰ পিছতে ভাৰতীয় জনতা পাৰ্টীয়ে কংগ্ৰেছক তীব্ৰ  সমালোচনা কৰিছে৷   ইণ্ডিয়ান অভাৰচিজ কংগ্ৰেছৰ অধ্যক্ষ ছেম পিত্ৰোদাই  দক্ষিণ ভাৰতৰ লোকসকল  "দেখিবলৈ আফ্ৰিকান লোকৰ দৰে  ,পশ্চিমৰ লোকসকলক আৰৱৰ দৰে দেখায় আৰু পূৱত থকা লোকসকলক চীনা যেন লাগে’’ বুলি কৰা মন্তব্যক  'বৰ্ণবাদী' মন্তব্য আখ্যা দিছে । অসমৰ মুখ্যমন্ত্ৰী হিমন্ত  বিশ্ব শৰ্মাই এই বিষয়ত  প্ৰথমে প্ৰতিক্ৰিয়া প্ৰকাশ কৰিছে৷  মুখ্যমন্ত্ৰী শৰ্মাই এক্সত  পিত্ৰোদাক তেওঁৰ মন্তব্যৰ বাবে সমালোচনা কৰি কয়, "ছেম ভাই, মই উত্তৰ-পূৰ্বাঞ্চলৰ আৰু মই দেখিবলৈ এজন ভাৰতীয়ৰ দৰে । আমি এখন বৈচিত্ৰ্যপূৰ্ণ দেশ; আমি বেলেগ দেখাব পাৰোঁ, কিন্তু আমি সকলো এক। আমাৰ দেশৰ বিষয়ে অলপ শিকক।" বিজেপি নেতা শ্বাহজাদ পুনাৱালাই পিত্ৰোদাক সমালোচনা কৰি কয়, "শব্দবোৰ আংকল ছেমৰ, কিন্তু ধাৰণাবোৰ ৰাহুল গান্ধীৰ।" উত্তৰ-পূৰ্বাঞ্চলৰ লোকসকলক চীনা লোকৰ সৈতে তুলনা কৰি তেওঁ ঘৃণাৰ দোকান খুলি লোৱা বুলিও পুনাৱালাই কয়৷