ডিজিটেল ডেস্কঃ যোৱা ডেৰ দশক পূৰ্বেই তেওঁক হত্যা কৰা হৈছিল। কিন্তু এতিয়া দাবী কৰা হৈছে যে শ্ৰীলংকাৰ তামিল উগ্ৰপন্থী সংগঠন এল টি টি ইৰ প্ৰতিষ্ঠাপক ভেলুপিল্লাই প্ৰভাকৰন এতিয়াও জীয়াই আছে। সোমবাৰে তামিলনাডুৰ সংগঠন ‘তামিল জাতীয় আন্দোলন’ৰ নেতা পি নেডুমৰাণে এই দাবী কৰিছে।
শ্ৰীলংকাত পৃথক তামিল ৰাজ্য (ইলাম)ৰ সমৰ্থনত থাঞ্জাভুৰত অনুষ্ঠিত বৈঠকত সোমবাৰে তেওঁ কয় যে ভেলুপিল্লাই প্ৰভাকৰন এতিয়াও জীয়াই আছে। অতি সোনকালেই তেওঁ দেখা দিব।
শ্ৰীলংকা চৰকাৰে দাবী কৰি আহিছে যে ২০০৯ চনৰ ১৮ মে’ত উত্তৰ-পূবৰ মুল্লাইটিভু অঞ্চলত চূড়ান্ত পৰ্যায়ৰ যুদ্ধত প্ৰভাকৰনকে ধৰি এলটিটিইৰ সকলো শীৰ্ষ নেতা নিহত হৈছিল। মুল্লাইটিভুৰ সমীপৰ তামিল উগ্ৰপন্থীৰ শেষ দুৰ্গ মুলিভাইক্কালৰ লেগুনৰ পৰা প্ৰভাকৰনৰ মৃতদেহো উদ্ধাৰ কৰা হয়।
মূলতঃ সেই বছৰৰ আৰম্ভণিতে আৰম্ভ হোৱা শ্ৰীলংকা সেনাৰ অভিযানত ৪০ হাজাৰৰো অধিক সাধাৰণ তামিল নাগৰিক নিহত হৈছিল। সেই যুদ্ধত প্ৰভাকৰণৰ পত্নী, কন্যা আৰু দুজন পুত্ৰৰো মৃত্যু হয়।
পিছত ব্ৰিটিছ টিভি চেনেলত প্ৰকাশিত ভিডিঅ’ ফুটেজ আৰু ছবিৰ পৰা পোহৰলৈ আহিছে যে এলটিটিইৰ মুৰব্বীৰ নাবালক পুত্ৰ বালাচন্দ্ৰনক জীৱিত অৱস্থাত বন্দী কৰাৰ পিছত ৰাষ্ট্ৰপতি মহিন্দ ৰাজাপাকছাৰ সেনাই গুলীয়াই হত্যা কৰিছিল।
শ্ৰীলংকাকে ধৰি বিভিন্ন দেশৰ স্বাধীনতা সমৰ্থক তামিল সংগঠনৰ এটা অংশই অৱশ্যে আৰম্ভণিৰে পৰাই প্ৰভাকৰন জীয়াই আছে বুলি দাবী কৰি আহিছে।
ইয়াৰ পিছত ইণ্টাৰনেটত ভাইৰেল হোৱা এখন ছবিত প্ৰভাকৰনক টিভিৰ সন্মুখত বহি তেওঁৰ মৃত্যুৰ খবৰ চাই থকা দেখা গৈছিল। কিন্তু পিছত গম পোৱা যায় যে ছবিখন ভুৱা।
অৱশ্যে এম ডি এম কে নেতা ৰাজ্যসভাৰ সাংসদ ভাইকোৱে সেই সময়ত দাবী কৰিছিল যে প্ৰভাকৰন জীয়াই আছে।
Continue Reading
