ডিজিটেল ডেস্ক: জৈৱ-বৈচিত্র্যৰে পূৰ্ণ অসমত সন্ধান পোৱা গৈছে এক অতি বিৰল আৰু সংকটাপন্ন ঘৰিয়ালৰ। যিসময়ত সমগ্ৰ বিশ্বতে এটাৰ পাছত এটাকৈ প্রাণী সংকটৰ গৰাহত পৰিছে, তেনে সময়তে লোহিত-ব্ৰহ্মপুত্ৰৰ সংগমস্থলীত দেখা পোৱা এই বিৰল প্ৰজাতিৰ ঘঁৰিয়ালটোৱে জৈব্য-বৈচিত্র্য সংৰক্ষণৰ এক ক্ষেত্ৰত নতুন আশাৰ সৃষ্টি কৰিছে।
ৰাজ্যৰ বনমন্ত্রী জয়ন্ত মল্লবৰুৱাই অসমত সন্ধান লাভ কৰা এই বিৰল প্ৰজাতিৰ প্ৰাণীটোৰ ফটো সামাজিক মাধ্যমত শ্বেয়াৰ কৰি উল্লেখ কৰিছে যে যোৱা ২৫ ছেপ্টেম্বৰত জৈৱ-বৈচিত্র্য জৰীপৰ সময়ত লোহিত নদীৰ এটা বালিচৰত ৰ'দ লৈ থকা অৱস্থাত ঘৰিয়ালটো প্ৰত্যক্ষ কৰি কেমেৰাত বন্দী কৰা হয়।
বৈজ্ঞানিকভাৱে গেভিয়ালিছ গংগেটিকাছ (Gavialis gangeticus) নামেৰে পৰিচিত এই ঘৰিয়ালটো ভাৰতৰ অন্যতম সংকটাপন্ন নদীজীৱ প্রজাতি। দীঘল আৰু সৰু মুখমণ্ডলৰ বাবে সহজে চিনাক্ত কৰিব পৰা এই জলচৰ প্ৰাণীবিধৰ সংখ্যা দেশত দ্রুতগতিত হ্রাস পাইছিল। সেয়েহে লোহিত-ব্ৰহ্মপুত্ৰৰ সংগমত ইয়াৰ উপস্থিতিৰ শেহতীয়া তথ্যই অসমৰ নদী পৰিৱেশত এতিয়াও এই প্ৰজাতিৰ বাবে উপযোগী বাসস্থান থকা বুলি নতুন ইংগিত দিছে।' ইয়াৰ পূৰ্বেও ব্ৰহ্মপুত্র অৱবাহিকাৰ বিভিন্ন স্থানত, বিশেষকৈ ডিব্ৰু-ছৈখোৱা আৰু কাজিৰঙা অঞ্চলৰ ওচৰত, ঘৰিয়ালৰ উপস্থিতিৰ তথ্য পোৱা গৈছে বুলি জনাই তেওঁ লগতে কয় যে লোহিত নদীত পোৱা এই নতুন তথ্যই ব্ৰহ্মপুত্ৰ আৰু ইয়াৰ উপনদীসমূহত ঘৰিয়ালৰ বিস্তৃতি, চলাচল আৰু বাসস্থানৰ বিষয়ে অধিক পদ্ধতিগত অধ্যয়নৰ প্রয়োজনীয়তা বৃদ্ধি কৰিছে।
আনহাতে, এই বিশেষ প্ৰজাতিৰ ঘঁৰিয়ালক সংৰক্ষণ আৰু ইয়াৰ সংখ্যা বিস্তাৰৰ ওপৰত গুৰুত্ব আৰোপ কৰি বনমন্ত্ৰীগৰাকীয়ে লগতে কয়, 'লোহিতৰ বালিচৰত ঘৰিয়ালৰ এই উপস্থিতিয়ে যেন এক স্পষ্ট বার্তা দিছে- সেয়া হৈছে নদীক সুৰক্ষিত কৰি ৰাখিলে নদীৰ সৈতে থকা বিৰল জীৱসমূহো সুৰক্ষিত হৈ থাকিব।'
উৎস: দৈনিক জনমভূমি
Continue Reading
