উজনি অসমত বানত ক্ষতিগ্ৰস্ত ৰে’লপথ মেৰামতিৰ কাম আৰম্ভ উত্তৰ-পূব সীমান্ত ৰে’লৱেৰ

ডিজিটেল ডেস্ক: উজনি অসমত বিধ্বংসী বানপানীয়ে ৰে'লৱে আন্তঃগাঁথনিৰ ব্যাপক ক্ষতি কৰাৰ দুসপ্তাহ পিছত উত্তৰ-পূব সীমান্ত ৰে'লৱেই তিনিচুকীয়া সংমণ্ডলৰ অধীনত বানত ক্ষতিগ্ৰস্ত ৰে'লপথসমূহ মেৰামতিৰ কাম আৰম্ভ কৰিছে। ১৯ জুলাইত হোৱা বানপানীৰ ফলত ৰে'লপথৰ যথেষ্ট ক্ষতি হৈছিল আৰু ৩১ জুলাইৰ পৰা এই মেৰামতিৰ কাম যুদ্ধকালীন তৎপৰতাৰে চলি আছে।

এই বিধ্বংসী বানপানীয়ে শিৱসাগৰ, চৰাইদেউ আৰু যোৰহাট জিলাৰ মাজেৰে যোৱা ৰে'লপথৰ বিশাল অংশ উটুৱাই নিছিল। ফলত ৰে'ল সেৱা সম্পূৰ্ণৰূপে বন্ধ হৈ পৰে, যাৰ বাবে উজনি অসমৰ জনসাধাৰণৰ যাতায়াত আৰু সামগ্ৰী পৰিবহণত গুৰুতৰ প্ৰভাৱ পৰে। ৰে'লপথৰ ওপৰত নিৰ্ভৰশীল এই অঞ্চলৰ বাবে ই এক ডাঙৰ সমস্যা আছিল।

ক্ষতিগ্ৰস্ত অঞ্চলসমূহত ৰে'লৱে অভিযন্তা, বৃহৎ সংখ্যক কৰ্মী আৰু অত্যাধুনিক যন্ত্ৰপাতি নিয়োগ কৰা হৈছে। এই দলবোৰে দিন-ৰাতি একাকাৰ কৰি উটুৱাই নিয়া ৰে'লপথৰ অংশসমূহ পুনৰ নিৰ্মাণৰ কামত ব্ৰতী হৈছে। পথ মেৰামতিৰ জৰিয়তে সোনকালেই ৰে'ল সেৱা পুনৰ আৰম্ভ কৰাৰ লক্ষ্যৰে কাম চলাই থকা হৈছে।

উত্তৰ-পূব সীমান্ত ৰে'লৱেৰ এই তৎপৰতাই অতি সোনকালে উজনি অসমৰ ৰে'ল যোগাযোগ পুনৰ স্থাপন হোৱাৰ আশা জগাই তুলিছে, যাৰ ফলত জনসাধাৰণৰ স্বাভাৱিক জীৱন যাত্ৰা পুনৰ আৰম্ভ হ'ব।