৫.৫৪%লৈ বৃদ্ধি খুচুৰা মুদ্রাস্ফীতি

ডিজিটেল ডেস্ক : খুচুৰা মুদ্রাস্ফীতিৰ হাৰ যোৱা মাহত পুনৰ বৃদ্ধি পায়। চৰকাৰে প্ৰকাশ কৰা তথ্যৰ পৰা এই কথা জনা গৈছে। যোৱা মাহত খুচুৰা মুদ্রাস্ফীতিৰ হাৰ একেৰাহে একাদশ মাহৰ বাবে বৃদ্ধি পাই ৫.৫৪% হয়। খুচুৰা মুদ্রাস্ফীতিৰ হাৰ দুবছৰৰ ভিতৰত সৰ্বাধিক হয়। আনহাতে, একেৰাহে চতুৰ্থ মাহত মুদ্রাস্ফীতিৰ হাৰ ৰিজার্ভ বেংকে বান্ধি দিয়া নিৰ্ধাৰিত সীমা ৪%ৰ অধিক হয়। 

উল্লেখযোগ্য যে আগষ্ট মাহত খুচুৰা মুদ্রাস্ফীতিৰ হাৰ ৪.৮৩% আছিল। খুচুৰা মুদ্রাস্ফীতিৰ হাৰ বৃদ্ধিক আটাইতকৈ বেছি প্রভাৱ পেলায় খাদ্য সামগ্ৰীৰ দাম বৃদ্ধিয়ে। যোৱা মাহত খাদ্য সামগ্ৰী বিশেষকৈ শাক-পাচলিৰ দাম যথেষ্ট বৃদ্ধি পায়। ইয়াৰ লগতে খাৰুৱা তেলৰ দাম বৃদ্ধি তথা আমদানি কৰা সামগ্ৰীৰ দাম বৃদ্ধিৰ প্ৰভাৱো আছে। যোৱা মাহত গ্রামাঞ্চলৰ মুদ্রাস্ফীতিৰ হাৰ ৬.০৮% (আগষ্টত ৫.২৪%) আৰু নগৰাঞ্চলত ৪.৮৮% (আগষ্টত ৪.২৫%) আছিল। খাদ্য সামগ্ৰীৰ মুদ্রাস্ফীতিৰ হাৰ আগষ্ট মাহত ৫.৯৭%ৰ তুলনাত ছেপ্টেম্বৰত অধিক বৃদ্ধি পাই ৭.৭৪% হয়গৈ। 

গ্রামাঞ্চলত খাদ্য সামগ্রী মুদ্রাস্ফীতিৰ হাৰ ৮.৬%লৈ আৰু নগৰ অঞ্চলত ৭.১৮%লৈ বৃদ্ধি পায়। যোৱা মাহত সর্বাধিক বৃদ্ধি ১০৮.০৯% দাম বৃদ্ধি পায় পিঁয়াজৰ। আনহাতে, আদাৰ ৬২.৮৫% আৰু নহৰুৰ দাম ৫৪.৬২% বৃদ্ধি পায়। ৰূপৰ অলংকাৰৰ দাম ৮৭% বৃদ্ধি পায়। অৱশ্যে, আলুৰ মুদ্রাস্ফীতিৰ হাৰ ১১.৫০%ত সুস্থিৰ হৈ থাকে আৰু বিলাহীৰ দাম ৮.৬২%লৈ হ্রাস পায়।

উৎস: দৈনিক জনমভূমি