ডিজিটেল ডেস্ক: কাছাৰ জিলাত পুনৰ সংঘটিত হৈছে এক শোকাবহ পথ দুৰ্ঘটনা। চালকৰ বেপৰোৱা গতিত বাহন চলোৱা, অতিৰিক্ত অভাৰটেক আৰু প্ৰতিযোগিতামূলকভাৱে গাড়ী চলোৱাৰ ফলত মঙলবাৰে গভীৰ নিশা শ্ৰীকোনাৰ নৱনিৰ্মিত মিনি সচিবালয় আৰু উৰণ সেতুৰ মাজৰ পথত সংঘটিত হয় এক ভয়ংকৰ দুৰ্ঘটনা।
এখন মালবাহী ট্ৰাকৰ সৈতে মুখামুখি সংঘৰ্ষত চাৰিখন বাহন ক্ষতিগ্ৰস্ত হয়। ঘটনাস্থলীতে দুজন ই-অ’ট’ যাত্ৰীৰ মৃত্যু হয়। আনহাতে ই-অ’ট’ চালকসহ তিনিজন গুৰুতৰভাৱে আহত হয়।
যান-বাহন আৰক্ষীৰ প্ৰাথমিক তদন্ত অনুসৰি, অন্ধকাৰাচ্ছন্ন উৰণ সেতুৰ পৰা নামি অহাৰ সময়ত বিপৰীত দিশৰ পৰা অহা এখন ই-অ’ট’, এখন স্কুটি আৰু আন দুখন বাহনৰ সৈতে মালবাহী ট্ৰাকখনৰ মুখামুখি সংঘৰ্ষ হয়। সংঘৰ্ষৰ তীব্ৰতাত স্কুটিখন সম্পূৰ্ণৰূপে চূৰ্ণ-বিচূৰ্ণ হৈ পৰে আৰু দুখন ই-অ’ট’ যাত্ৰী পথৰ কাষলৈ ছিটিকি পৰে।
প্ৰত্যক্ষদৰ্শীৰ অভিযোগ অনুসৰি, দুৰ্ঘটনাৰ পূৰ্বে ই-অ’ট’খনৰ চালকে আন এখন বাহনৰ সৈতে প্ৰতিযোগিতা কৰি তীব্ৰ গতিত বাহন চলাই আছিল। অতিৰিক্ত গতি আৰু বেপৰোৱা ওভাৰটেকৰ ফলতেই এই শোকাবহ দুৰ্ঘটনা সংঘটিত হোৱা বুলি তেওঁলোকে দাবী কৰিছে।
নিহত দুজন যাত্ৰীৰ ঘৰ ক্ৰমে শ্ৰীকোনা আৰু চাবাছপুৰ অঞ্চলত। গুৰুতৰভাৱে আহত তিনিজন লোকক উদ্ধাৰ কৰি তৎক্ষণাত শিলচৰ চিকিৎসা মহাবিদ্যালয় আৰু চিকিৎসালয়ত ভৰ্তি কৰা হৈছে। তেওঁলোকৰ অৱস্থা সংকটজনক। ইয়াৰ উপৰিও দুৰ্ঘটনাত কেইবাজনো ই-অ’ট’ যাত্ৰী সামান্য আহত হৈছে।
Continue Reading
