ডিজিটেল ডেস্কঃ গৰমৰ দিন ফলৰ ৰজা আম সকলোৰে প্ৰিয়৷বিগত বৰ্ষৰ দৰেই বাংলাদেশৰ প্ৰধানমন্ত্ৰী শ্বেইখ হাছিনাই অসমৰ মুখ্যমন্ত্ৰী হিমন্ত বিশ্ব শৰ্মালৈ উপহাৰ হিচাপে সুস্বাদু আম প্ৰেৰণ কৰিছে। কালি কইনাধাৰা ৰাজ্যিক অতিথিশালাত বাংলাদেশৰ সহকাৰী উচ্চায়ুক্ত ৰুহুল আমিনে পত্নী ড০ নবনিতা হোকেৰ সৈতে ৩০০ কিলোগ্ৰাম উন্নত জাত ‘হিমসাগৰ’ আৰু ‘লেঙৰা’ আম মুখ্যমন্ত্ৰীক অৰ্পণ কৰে। বাংলাদেশৰ পৰা ঋতুভিত্তিক, ৰসাল ফল পঠোৱাৰ বাবে মুখ্যমন্ত্ৰীয়ে শ্বেইখ হাছিনাক ধন্যবাদ জ্ঞাপন কৰে।
উত্তৰ-পূৰ্বাঞ্চলৰ সকলো ৰাজ্যৰ মুখ্যমন্ত্ৰী, ৰাজ্যপাল, বিশিষ্ট ব্যক্তি, চৰকাৰী বিষয়া, নাগৰিক সমাজৰ সদস্যলৈও আম প্ৰেৰণ কৰা হৈছে৷ সহকাৰী উচ্চায়ুক্তগৰাকীয়ে কয় যে বাংলাদেশৰ প্ৰধানমন্ত্ৰীয়ে উত্তৰ-পূৰ্বাঞ্চলৰ বিশিষ্ট ব্যক্তিসকলৰ বাবে উত্তম আম প্ৰেৰণ কৰিছে। ইয়াৰ দ্বাৰা দুয়োখন দেশৰ মাজত উৎকৃষ্ট সম্পৰ্ক আৰু অধিক শক্তিশালী হ’ব বুলিও তেওঁ লগতে কয়।
উল্লেখযোগ্য যে বাংলাদেশৰ প্ৰধানমন্ত্ৰী শ্বেইখ হাছিনাই পশ্চিম বংগৰ মুখ্যমন্ত্ৰী মমতা বেনাৰ্জীলৈয়ো ৬০০ কেজি আম উপহাৰ হিচাপে প্ৰেৰণ কৰিছে বুলি সোমবাৰে বিষয়াসকলে প্ৰকাশ কৰে।
Continue Reading
