ডিজিটেল ডেস্ক; অদম্য উৎসাহ, বৃত্তিৰ প্ৰতি শ্ৰদ্ধা আৰু আস্থাশীল মনোভাৱ আৰু কৰ্মস্পৃহাই এগৰাকী ব্যক্তিক ‘সফল’ কৰি গঢ়ি তুলিব পাৰে৷ সফলতাৰ সংজ্ঞা যদিও আপেক্ষিক, তথাপি সময়ে নিৰূপণ কৰে সফলতাৰ সংজ্ঞা৷ আজি এগৰাকী ১৯ বছৰীয়া যুৱকৰ কাহিনী ক’বলৈ ওলাইছোঁ৷ যি কাহিনীয়ে আপোনাকো কৰিব অনুপ্ৰাণিত৷ যি কাহিনীৰ পটভূমিয়ে আপোনাকো দিব সমুখলৈ চাই খোজ দিয়াৰ সাহস৷
নাম তেওঁৰ কাইভালিয়া ভোহৰা৷ এগৰাকী যুৱ উদ্যোগী৷ মাত্ৰ ১৯ বছৰ বয়সতে এইগৰাকী উদ্যোগীয়ে প্ৰৱেশ কৰিছে ১,০০০ কোটিৰ ক্লাবত৷ আৰু ১,০০০ কোটিৰ ক্লাবত প্ৰৱেশ কৰা আটাইতকৈ কম বয়সীয়া ভাৰতীয় হিচাপে চিহ্নিত হৈছে৷
কুইক ডেলিভাৰী ষ্টাৰ্টআপ প্ৰতিষ্ঠান ‘জেপ্টো’ৰ সহ-প্ৰতিষ্ঠাপক কাইভালিয়া ভোহৰা৷ আইআইএফএল ৱেলথ-হুৰুন ইণ্ডিয়াৰ ৰিচ্ লিষ্ট ২০২২ত আটাইতকৈ কম বয়সীয়া ধনাঢ্য উদ্যোগী হিচাপে পৰিগণিত হৈছে কাইভালিয়া৷ ১৯ বছৰ বয়সতে কাইভালিয়া হৈছে আটাইতকৈ ধনী ভাৰতীয়সকলৰ ভিতৰত আটাইতকৈ কনিষ্ঠ। হুৰুনৰ তালিকাত ১,০০০ কোটি মুঠ সম্পত্তিৰ সৈতে কাইভালিয়া ১০৩৬ নম্বৰ স্থানত আছে। আৰু এই তালিকাত স্থান পাইছে আদিত পালিচায়ো৷ আদিত পালিচাৰ স্থান ৯৫০ আৰু তেওঁৰ মুঠ সম্পত্তিৰ পৰিমাণ ১,২০০ কোটি টকা।
তেওঁলোকে পূৰ্বে ফৰ্বছ আলোচনীৰ প্ৰভাৱশালী ‘30 আণ্ডাৰ 30 (এছিয়া তালিকা)’ত ই-কমাৰ্চ শ্ৰেণীত স্থান পাইছিল।
দুয়োগৰাকী যুৱ উদ্যোগী হুৰুন ইণ্ডিয়া ফিউচাৰ ইউনিকৰ্ণ ইণ্ডেক্স- ২০২২ৰ আটাইতকৈ কম বয়সীয়া ষ্টাৰ্ট-আপ প্ৰতিষ্ঠাপক। ভাৰতৰ আটাইতকৈ ধনী সকলৰ তালিকাত ভোহৰা আৰু পালিচাৰ অন্তৰ্ভুক্তিয়ে দেশৰ ষ্টাৰ্টআপৰ বৰ্ধিত প্ৰভাৱকে সূচাইছে।
ভোহৰা আৰু পালিচা ষ্টেনফৰ্ড বিশ্ববিদ্যালয়ৰ শিক্ষাৰ্থী আছিল, যিয়ে পাছত তেওঁলোকৰ কম্পিউটাৰ বিজ্ঞানৰ পাঠ্যক্ৰম এৰিছিল আৰু উদ্যোগশীলতা অনুসৰণ কৰিছিল। মহামাৰীৰ দিনত অত্যাৱশ্যকীয় সামগ্ৰীৰ দ্ৰুত আৰু সম্পৰ্কহীন বিতৰণৰ বৰ্ধিত চাহিদা পূৰণ কৰিবলৈ দুয়োজন বন্ধুৱে ২০২১ চনত আৰম্ভ কৰিছিল জেপ্টো৷
পালিচাই ১৭ বছৰ বয়সত তেওঁৰ উদ্যোগ-যাত্ৰা আৰম্ভ কৰিছিল যেতিয়া তেওঁ ২০১৮ চনত গোপুল নামৰ শিক্ষাৰ্থীসকলৰ বাবে কাৰপুল সেৱা প্ৰতিষ্ঠা কৰিছিল। তেওঁৰ ষ্টাৰ্টআপ আৰম্ভ কৰাৰ পূৰ্বে তেওঁ গোপনীয়তা নীতিৰ ওপৰত আধাৰিত কৃত্ৰিম বুদ্ধিমত্তা (এআই) আধাৰিত প্ৰকল্প প্ৰাইভেচিৰ সৈতে এক প্ৰকল্পৰ নেতৃত্বত আছিল।
ডুবাইত ডাঙৰ-দীঘল হোৱা দুয়োজন শৈশৱৰ বন্ধুৱে আৰম্ভণিতে মুম্বাইৰ স্থানীয় দোকানৰ পৰা গ্ৰোচাৰী সামগ্ৰী বিতৰণ কৰা এক অনলাইন প্লেটফৰ্ম কিৰানাকাৰ্ট নামৰ এক অনলাইন প্লেটফৰ্ম মুকলি কৰে। এই প্লেটফৰ্ম ২০২০ৰ জুনৰ পৰা বিগত বৰ্ষৰ মাৰ্চলৈ কাৰ্যক্ষম আছিল। তাৰ পাছত তেওঁলোকে ২০২১ চনৰ এপ্ৰিলত জেপ্টো আৰম্ভ কৰিছিল আৰু নৱেম্বৰত প্ৰাৰম্ভিক পুঁজি ৰাউণ্ডত ৬০ নিযুত ডলাৰ সংগ্ৰহ কৰিছিল। দ্ৰুত গ্ৰোচাৰী ডেলিভাৰী প্লেটফৰ্মেও ডিচেম্বৰত ৫৭০ নিযুত ডলাৰ মূল্যাংকনত ১০০ নিযুত ডলাৰ নিযুত সংগ্ৰহ কৰিছিল। শেহতীয়া পুঁজিৰ পৰ্যায়ত জেপ্টোৱে এই বছৰৰ মে মাহত ৯০০ নিযুত ডলাৰৰ মূল্যাংকনত ২০০ নিযুত ডলাৰ সংগ্ৰহ কৰিছিল।
Continue Reading
