ডিজিটেল ডেস্কঃ আড়ম্বৰ আয়োজন। সাগৰীয় মাছ, গৰুৰ মাংস, স্কোৱাব, হাঁহ, চিকেন... শেষত ভিক্টোৰিয়া পুডিং! টাইটানিকত আয়োজন কৰা হৈছিল এই ৰাজকীয় আয়োজন। সেই জাহাজখনৰ প্ৰথম শ্ৰেণীৰ কোটিপতি যাত্ৰীসকলৰ বাবে ৰাতিৰ আহাৰ গ্ৰহণৰ মেনু। এতিয়া সেই বগা মেনু কাৰ্ডখনে মলিয়ন হৈ পৰিছে। অৱশ্যে খাদ্যৰ নামসমূহ পঢ়িব পৰা হৈয়েই আছে। কাৰ্ডখনৰ সোঁফালে লিখা আছে০ ১১ এপ্ৰিল, ১৯১২! ওপৰত ৰঙা পতাকা, মাজত বগা তৰা। এইখন টাইটানিকৰ পতাকা।
মেনু কাৰ্ডখন আৰ এম এছ টাইটানিকৰ। ইমান বিশাল জাহাজ পৃথিৱীত আগতে কেতিয়াও নিৰ্মাণ হোৱা নাছিল। বিশেষজ্ঞসকলে কৈছিল এই জাহাজখন কেতিয়াও ডুব নাযায়। কিন্তু ইংলেণ্ডৰ চাউথমপটনৰ পৰা নিউয়ৰ্কলৈ যোৱা জাহাজখনে প্ৰথম যাত্ৰাতে দুৰ্যোগৰ সন্মুখীন হ’বলগীয়া হয়। ১৯১২ চনৰ ১৪ এপ্ৰিলত টাইটানিক জাহাজে উত্তৰ আটলাণ্টিক মহাসাগৰৰ এটা বিশাল বৰফৰ পাহাৰত খুন্দা মাৰে। সেই নিশা টাইটানিক ডুব গ’ল। কমেও ১৫০০ লোকে প্ৰাণ হেৰুৱালে। লাইফবোটত উপনীত হোৱাসকল বাচিল।
তেনে এজন যাত্ৰীয়ে হয়তো টাইটানিকৰ পৰা ওলাই যোৱাৰ আগতে মেনু কাৰ্ড এখন স্মৃতি হিচাপে লগত লৈ গৈছিল। জাহাজ ডুবাৰ তিনিদিন আগৰ মেনু কাৰ্ডখন এইবাৰ লণ্ডনত নিলাম কৰা হৈছে। মূল্য ৮৩ হাজাৰ পাউণ্ডলৈ বৃদ্ধি পাইছে। ভাৰতীয় মুদ্ৰাত ৮৪.৫ লাখ টকা। মেনু কাৰ্ডখন কাৰ আছিল, কোনে জাহাজৰ পৰা আনিছিল সেয়া জনা নাযায়।
Continue Reading
